Malittarisassat akerleriittut KNR-ip inuusuttunut aallakaatitsivia eqqorpaat
![](/sites/default/files/styles/image_934x467/public/article_images/voice-of-greenland.jpg?itok=_XOD4tUt)
KNR-ip sumiiffimmi radiomi suut aallakaateqqusaanerai paasiuminaapput.
Naalakkersuisoqarfiup maanna aalajangerpaa KNR-ip inuusuttunut aallakaatitassiani sumiiffimmi radiomi aallakaateqqusaanngikkai. Taamaattorli Inatsisartut ataatsimiinnerannit toqqaannartumik aallakaatitsisinnaapput imaluunniit DR-ip radioa P1 sumiiffimmut aallakaatissinnaallugu.
Nuna tamakkerlugu aallakaatitsissaaq
Taamaattoqarnera paatsiveerunnarsinnaavoq, tassungalu pissutaavoq Namminersorlutik Oqartussat aallakaatitassiornermik suliaqartut qanoq nassuiaaserneraat. Aallakaatitassiornermimmi suliaqartut kisimik nuna tamakkerlugu aallakaatitsisussaammata.
Naalakkersuisoqarfiup Radioaviisimut paasissutissiissutigaa aallakaatitassiornermik suliaqartut tassaasut nammineq immiussanit, satiletikkut aallakaatitassianit, dvd-nit aallakaatitassianit naammasseriikkanik katitikkanik imaluunniit aaqqissukkanik imallit, taakkulu sumiiffinniinnaq aallakaateqqusaanngitsut.
P1 sumiiffimmi aallakaatissinnaavoq
Taamaattorli aallakaatitassiat naammasseriikkat, tassa aaqqissoqqitassaanngitsut katitigassaanngitsullu, aallakaatinneqarsinnaasut. Taamaammat malittarisassat unioqqutinnagit KNR-ip P1 Inatsisartuniillu toqqaannaq aallakaatitsisarpoq. Inuusuttunulli radioni malittarisassat malillugit aallakaateqqusaanngilaa, fjernsynikkut radiokkulluunniit nuna tamakkerlugu aallakaatitsinissamik akuersissummik pitinnani.
Aamma atuaruk KNR-ip pisortaa: Sermitsiaq.AG imminut ajunngitsussarsiuuppoq
KNR-ip aqutsisuinut niaqorluutaasoq tassaavoq inuusuttunut radio aallakaatitassiornermik suliaqarnerugami taamaattumillu sumiiffimmiinnaq aallakaatinneqaqqusaanani. Taamaattumik maanna internettikkuinnaq aallakaatinneqartoq.
Maanili paasiuminaassivoq. Radiop aningaasannanniarnera oqallinnermut ilanngunneqaraangat suna tamarmi killormuulersarmat.
Aallakaatitassiornermik suliaqartoq aallakaatitassiornermillu suliaqanngitsoq
Radio internettikkut aallakaatinneqarmat radiokanali ussassaareqqusaanngilaq, radio internettikkut aallakaatinneqartoq aallakaatitassiornermik suliaqartutut nalilerneqartanngimmat, KNR-ilu aallakaatitassiornermik suliaqarfiusuni kisimi ussassaareqqusaavoq.
Tassa Inuusuttunut radio aallakaatitassiornermik suliaqarpoq taamaalillunilu sumiiffimmiinnaq aallakaatitseqqusaanani. Sumiiffimmiinnaq aallakaatitseqqusaannginnami internettikkuinnaq aallakaatinneqarpoq. Internettikkut aallakaatinneqarmat aallakaatitassiornermik suliaqartutut nalilerneqarunnaarpoq taamaalillunilu ussassaarutinik aallakaatitseqqusaanani.