Malinnaasoq: Qineqqusaartut peqqinnissaqarfik politiillu atugaat sammilluarpaat
Peqqinnissaqarfik nunatta ukiut 30-t matuma siorna akisussaaffigilerpaa.
Taamaakkaluartoq peqqinnissakkut ajornartorsiutit Folketingimut qineqqusaarnermi initoqisut, Sten Lund inuiaqatigiilerinermik ilinniagartooq nunatsinnilu qinersisarnerpassuarnik nalilersuisartoq oqarpoq:
-Peqqinnissaqarfik annertoorujussuarmik oqallissigineqarpoq, peqqinnissaqarfik assigiinngitsutigut qanoq ilillugu pitsanngorsaavigineqarnissaa, aammalu nunatsinniiginnassanersoq imaluunniit Danmarkimut suliakkiissutigineqassanersoq. Taanna eqqartorneqangaatsiartoq takusinnaavara.
Peqqinnissaqarfiup saniatigut politiit atugaat aamma sammineqarluartut Sten Lund nalilersuivoq:
- Politiit inatsisinik atuutsitsut aningaasarsiarisaat aaqqiissutaagallaannarmik ingerlasimasut aamma eqqartorneqallattaarput.
Pineqaatissinneqarsimasunut inissiisarfinni nakkutilliisut sillimaniarnerlu
Pineqaatissinneqarsimasunut inissiisarfinni nakkutilliisut politiitulli atugaqartut qanoq ililluni ataavartumik aaqqiivigineqarsinnaanerat pulaffigineqarpallaanngitsoq Sten Lund oqarpoq.
Tunngaviusumik inatsit naapertorlugu Folkertingi Danmarkimilu naalakkersuisut Naalagaaffeqatigiinni nunanut allanut tunngasuni sillimaniarnermilu oqartussaasuupput.
Nunarpullu nunat sakkussiaqarnikkut pissaaneqarnerpaat marluk Ruslandip USA-llu akornanniikkaluartoq, tamanna itinerusumik sammineqanngitsoq Sten Lund oqarpoq:
- Sorsuttoqalissagaluarpat nunarput qanoq ililluni eqqugaasinnaanera annertunerusumik eqqartorneqanngilaq, aammalu attaveqaqatigiinnermut sillimaniarneq qanoq ilillugit siunissami aaqqiiffigineqarsinnaanersut eqqartorneqarpallaanngillat.
Sullivinni isumannaallisaaneq eqqartorneqarpianngilaq
Nunatsinni inuuniarnermut attuumassuseqarnerusut ilaat soorlu, sullivinni isumannaallisaaneq qineqqusaartut oqallinneranni maqaasinartoq Sten Lund oqarpoq.
- Naak ajoraluartumik sulitilluni ajutoornerit akulikillisutut isikkoqaraluartut aammalu inatsisit - sulitilluni ajoqusersimanermut sillimmasiineq Danmarkip ataaniilluni. Tassani immikkut nakorsat piginnaasallit Danmarkimi kisimi pigineqartut pulaffigineqanngillat annerusumik.
Inuusuttut ernumassutigisaat pulaffigineqarpianngitsut
Inuusuttunit ernumassutigineqartartoq silap pissusiata allanngoriartornera kingunerilu qineqqusaartunit annerusumik sammineqannginnerat aamma maluginiarsimavai.
- Maannakkut inuusuttorpassuit ernumassutigivaat nammineq ukiut 20-t - 30-t nunarsuaq qanoq ittoq inuuffigilissanerlugu, taamaattumik piumasaqaatigivaat naapertuunnerusumik nunarsuatsinnik atuineq eqqumaffigeqquaat aalajangiisartunut. Taakkulu politikimut assigiinngitsutigut naalaalersinniaraanni soqutigisaat annertuumik aamma sammineqartariaqarput. Sten Lund taama oqarpoq.