Malik Holm sisoraatinik sangusaartartut VM-imut piareerpoq
Dansk Ski Forbundip sungiusaasuata Sven Ullrichip Malik Holmip nunarsuarmi pissartanngorniuunnermut peqataasinnaanissaa ilimagalugu siornali oqaatigaat, Malik Holmilli nunarsuarmi pikkorinnerpaanut unammisussanngornera aatsaat maanna piviusunngorpoq. kalaallip inuusuttup pikkorinnerpaat akornanni qullasissumik inissinnissaa immaqa ilimanarpallaanngikkaluarpoq, taamaakkaluartoq nunarsuarmi pissartanngorniuunnermut anngunneq angusaavoq annertooq.
- Maliup ineriartornera malittarisimavarput, sisoraatinillu timersornerup iluani pikkorinnerpaat ilaanniinnerat qularutissanngilaq, timersuutini nakkutigilluarpaa, angusassaminik toraagaqartuuvoq sisorarfimmilu pikkorilluinnartuulluni. Malik Holm siorna ingerlalluarpoq, Danmarkimi pissartanngorniuuttoqarmat sangusaapiloornermi siilvinnalluni, aamma Nunatsinni pissartanngorniuuttoqarmat, siorna poorskip nalaani ingerlanneqartumi, unammissutini tamani kuultinnappoq. Nunarsuarmi pissartanngorniuunnermut anngunnera nuannaarutigaarput. Sisorartartuuvoq pikkorilluinnartoq sungiusaraangami sukataartuartoq. Atugassarititaasut apeqqutaatillugit anguniakkamillu toraagaqarluni sulissuteqarnikkut immaqa kalaallit oqaluttuarisaaneranni OL-imut piukkussat inuusunnersaattut takorluukkani angusinnaavaa. Nunarsuarmi pissartanngorniuunnermi angusaasa ukiunilu aggersuni ineriartoqqinnissaata malittarinissaannut ESG qilanaarpoq, Lauritz Heilmann ESG-mi allattoqarfimmi pisortaq oqaluttuarpoq.
Malik Holm, maanna ukiut pingajussaa Elite Sport Greenlandimit tapiiffigineqartartoq Nuummiuuvoq, maannali Norgemi najugaqarluni. Tassani Rjukan skigymnasiumimi sungiusarlunilu ilinniartuuvoq.
