Malik Berthelsen qinigassanngortinnianngilaq
Siumukkormiut Inatsisartuni inuusukaartaat marluk Malik Berthelsen aamma Akitsinnguaq Olsen 2009-mi siullerpaamik qinigaasut Inatsisartunut qinigassanngorteqqinniaratik aalajangerput. Akitsinnguaq Olsen Inuit Ataqatigiit sinnerlugit qinigaavoq ukiorli naanngitsoq Siumukkunnut nuulluni.
Malik Berthelsen sunniuteqartarpoq assersuutigalugu oqaatsit pillugit oqallinneri, innuttaasut peqqinnerulernissaat pillugu oqallinnermi, imeruersaatit eqeersaatitallit pillugit oqallinnermit aammalu kingullertut imigassat sivisunerusumik tuniniarneqartalernissaat pillugu oqallinnermi.
- Kisianni tassa qinigassanngorteqqinniarnanga aalajangernera ukiup ataatsip matuma siorna pivoq. Tassani ilaquttakka neriorsorpakka qinigassanngorteqqinniarnanga, Malik Berthelsen KNR.gl-mut oqarpoq.
Taamaattoq isertunngilaa Naalakkersuisut siulittaasuat Kuupik Kleist qinersinissamik ippassaq nalunaarmat eqqumiilliorsimagaluarluni.
- Kisianni tassa qitornavut pingasunik qulinillu ukioqarput. Angajulleq ukiut tulliit ingerlaneranni inuusuttuaranngortussaavoq aamma nalunngilara ataatsimiinnerni sivisuumik aallaqqasarnikka ilaquttannut pikkunarsinnaasartut. Taamaattumik qinersilernermi pilerisuummeraluarnera ulloq naanngitsoq qaangiuppoq, Malik Berthelsen oqarpoq.
Siumukkormioq taanna 34-nik ukiulik Sisimiuni namminersorluni inuussutissarsiortuuvoq oqaatsitigullu pikkorissarnissamik pilersaaruteqarluni.
- Tamanna ilaqutariittut ukiut arlallit pilerigisimavarput. Nunatta avataani najugaqarallarluta oqaatsitigut pikkorissarnissarput suli siunniusimavarput, Malik Berthelsen umiatsimik angalaartarnissamut pinialuttarnissamullu piffissaqarnerulernissaminut qilanaartoq oqarpoq.
Taaneqareersutut 34-aannarnik ukioqarpoq kingusinnerusukkullu politikkimut uteratarsinnaanini nangartarnagu.
