Maliinap meeqqat pisinnaatitaaffii allaaserai
Meeqqat pillugit isumaqatigiissut ukiunik 21-nngortorsiorluni nalliuttorsiorpoq, tamannalu nalliussiniarlugu meeqqat pisinnaatitaaffii pillugit Unicef Danmark nittarsaassiniarpoq.
Tamatumunnga atatillugu inuit malunnaatillit arlallit Unicefip nittartagaani allattuipput. Tullinnguuttoq tassaavoq Inunnik Isumaginninnermut Naalakkersuisoq, Maliina Abelsen.
Unicefip nittartagaani ilanngutaa tassaavoq kalaallit meerartaasa pisinnaatitaaffii, atugarissaarnissaallu pillugit, videoliaq, minutsinik pingasunik sivisussusilik.
- Meeqqat Kalaallit Nunaanni nunarsuarmilu tamarmi pisinnaatitaaffii atugarissaarnissaallu pillugit suliniut meeqqat pillugit isumaqatigiissummi pingaarutilerujussuuvoq. Meeqqanut tamatta akisussaaffeqarpugut, Maliina Abelsen oqarpoq.
Meeqqat pillugit isumaqatigiissut Kalaallit Nunaata 1992-imi akuersissutigaa, Naalakkersuisullu Unicefimik suleqateqarnerulernissartik septembarimi isumaqatigiissuteqarfigaat, kalaallit meerartaasa pisinnaatitaaffii taamaalillutik nukittorsarneqarniassammata.
