Maliina: Juulli sioqqullugu akissarsisarneq sulisunut artukkiisarpoq
Juulli sioqqullugu nalinginnaasumik akissarsisoqassatillugu qaangiuttoortarneq paarlattaasussanillu atuineq pisariaqartinneqalertarpoq,taamaattumik aningaasarsisarnerup nalinginnaasunngortinneratigut ajoqutit taamattut pinngitsoortinneqarsinnaasut naalakkersuisut isumaqarput.
Allattoq Louise M. Kleemann
novembarip 11-at 2011 07:49
- Decembari qaammat aningaasarsialerivimmut ulapiffiunerpaasarpoq, tassa ukiup naanera tassani pissutaavoq. Ilutigalugu qaammammusialinnut juullertinnagu aningaasarsisitsisarnerup kinguneranik piffissap nalinginnaasup 2/3-a aningaasarsiassanik tunniussiviusarpoq. Tamatuma kinguneranik tarnikkut peqqinnartumik sulisarneq artukkerneqartarpoq kiisalu qaangiuttoortarneq paarlattaasussanillu atuinissaq pisariaqartinneqalertarluni. Aningaasarsisarnerup nalinginnaasunngortinneqarneratigut ajoqutaasartut aningaasartuutaasartullu pisariaqartinneqanngitsut taakkua pinngitsoortinneqassapput. Kristian Jeremiassenip Siumumeersup paragraf 37 naapertorlugu apeqqutaanut naalakkersuisoq Maliina Abelsen ilaatigut taama akivoq.
