Maliina: Angutit sulinngiffeqarnerulersillugit
Islandimi arnat erninerminnut atatillugu qaammatini pingasuni sulinngiffeqartarput, taamatuttaaq angutit qaammatini pingasuni sulinngiffeqartarlutik. Qaammatit kingulliit pingasut angajoqqaanngortunit avinneqartarput.
- Angajoqqaat sulinngiffeqarnerminnut atatillugu akissarsiamik 80 procentii pigiinnartarpaat, taamaasilluni angutit islandimiut meerartaartut tamarluinnarmik sulinngiffeqartalersimallutik, tamannalu naligiisitaanermut sunniuteqarsimaqaaq, Maliina Abelsen naligiisitaanermut naalakkersuisoq oqarpoq.
Nunatsinni angutit amerlanerit sulinngiffeqartalissappata suliffeqarfinnut piumaffiginninnerusoqartariaqartoq, inatsisitigullu tulluarsaasoqarluni, Naligiissitaanermut ataatsimiititaliami siulittaasoq Poul Hansen oqarpoq.
- Aatsaammi taamaasiornikkut perorsaaneq naligiinnerusoq anguneqarsinnaavoq, Poul Hansen oqarpoq.
Maliina Abelsen Poul Hansenilu naligiissitaaneq pillugu Ilulissani ataatsimeeqataaqqammerput. Ataatsimiinermi nunat avannarliit tamangajammik peqataatitaqarput.
