Maliina: Allannguileriinngikkutta annernarsissaaq
- Massakkuusariaqarpoq, oqariartuut ersarinnerusinnaanngilaq. Massakkuusariaqarpormi suliat tunngavilersorluakkat, aalajangiinissat oqimaatsut pitsaasullu siunissamut aalajangiiviginissaat, Maliina Abelsen KNR-imut oqarpoq.
30 milliard koruunit. Tassa Naalakkersuinikkut aqutsisut 2040 eqqarsaatigalugu, sipaarniarnikkut isertitsissutaasinnaasunillu allanik nassaarniarnikkut, aningaasat nassaarisariaqagaat.
Tamannalu isumaqarpoq Namminersorlutik Oqartussat, kommunit aamma piginneqatigiiffiit Namminersorlutik Oqartussanit pigineqartut ataatsimoorlutik ukiumut milliardinik sipaaruteqartalernissaannik.
Inuiaqatigiit ataatsimut ukioqqortusiartorput. Utoqqaallu utoqqalinersiuteqartut pilersorneqartussat amerliartorput, illuatungaani pilersuisussat ikiliartortut.
- Akileraarutitigut isertitat ikiliartorput utoqqarnut pilersuineq annertusiartortoq, aamma eqqarsaatigisariaqarpoq napparsimmaveqarfinnut aningaasartuutit amerliartortut. Taamatut ingerlaannarutta ajutuussaagut, nunattalu karsia imaarlugu, aningaasaqarnermut naalakkersuisoq Maliina Abelsen oqarpoq.
Nunatta karsianut isaatitsisoqartariaqarnera pillugu Naalakkersuisut aningaasanut inatsimmi ukioq manna atuuttumi isaatitsissutissanik nassaarniarsimapput. Ilaatigullu assersuutitut taaneqarsinnaapput avatangiisinut akitsuutinit akitsuisoqarsimanera orsussamillu akitsuisimanerat.
Maannalu ilaatigut aningaasanik aallerniarnermi akileraartarnermut atugarissaarnermullu isumalioqatigiissitaq siunnersuuteqarsimavoq illumik inigisamilluunniit tunisigaanni akissarsiatulli akileraarusiisoqartalissasoq.
Sipaarniarnerilli aamma pisariaqalersinnaasut Aningaasaqarnermut naalakkersuisoq Maliina Abelsen isumaqarpoq.
- Takorlooruminaappoq utoqqalinersiutinik annertuunik kinguaariit killiffianni siunissami pisinnaanissaq. Taamaattumillu pisariaqarpoq maanna siunissaq ungasinnerusoq eqqarsaatigalugu nammineerluni aningaasanik katersinissaq, Maliina Abelsen oqarpoq.
Taamaattumillu Maliina Abelsen isumaqarpoq ilinniarneq ilinniagaqarnerlu siunissaq aggersoq eqqarsaatigalugu eqqanaarinerusut pitsaasut.
Kalaallillu Nunaat 2040-mi 30 milliard koruuninik amigartooruteqarluni inissisimassanngippat pingaaruteqartoq iliuuseqarniarnerup inuiaqatiginni paasineqarluarnissaa.
- Tamanna tamatsinnut paasiuminaassinnaavoq. Maannami inissisimanerput eqqarsaatigalugu iliuuseqarnianngikkutta siunissami inissisimanissarput pitsaanavianngilaq, taamaattumik maanna allannguisoqartariaqarpoq, Maliina Abelsen naggasiivoq.
