Maliina Abelsen Unicef Kalaallit Nunaannimi siuliniutinut pisortanngulersoq
Naalakkersuisuusimasoq naalakkersuisuusimasumit taarserneqarpoq.
Maliina Abelsen Air Greenlandimi niuernermi pisortaasimallunilu Visit Greenlandimi siulersuisuni siulittaasuusimavoq. Taakkunani atorfeqannginnermini Arctic Winter Gamesip Nuummi 2016-imi ingerlanneqarnissaanut siuttuusimavoq.
Suliniutinut pisortanngortoq Inatsisartuni Naalakkersuisunilu ilaasortaasimavoq, Inuit Ataqatigiillu 2009-mit 2013-imut naalakkersuisuutiraqarneranni naalakkersuisuusimalluni.
Taanna Unicef Kalaallit Nunaanni suliniutinut maanna aggustip ulluisa qulinganni pisortanngussaaq.
Unicefip generalsekretæriata, Karen Hækkerup tamanna nuannaarutigaa:
- Maliinap Kalaallit Nunaanni suliniutitsinnut aqutsisunngorneratigut nukittuumik ajukkunnanngitsumillu aqutsisoqalissaagut. Isumaginninnermut tunngasunut naalakkersuisuusimanermi saniatigut Maliina inuiaqatigiit tamarmiusut kalaallit meerartaannut akisussaaffimmik tigusisinnaanerat pillugu paasisimasaqarluarpoq – tamannalu maannakkoqqissaaq suliatsinni pimoorullugu iliuuseqarfiginialeruttorparput, Karen Hækkerup tusagassiuutinut nalunaarummi oqarpoq.
Meeqqat pisinnaatitaaffii qulakkiissagai
Maliina Abelsenip suliniutinut pisortaasimasup killiffigisai ingerlateqqissavai. Tassa pisinnaatitaaffiit pillugit atuarfiit, kalaallit meerartaasa namminneq akunnerminnilu pisinnaatitaaffinnik ilisimanninnissaannut qulakkeerinnittussanik ilaatigut pilersitsinissaq sulissutigissavaa.
- Meeqqat nipaasa pisinnaatitaaffiisalu Kalaallit Nunaanni eqqumaffigineqarnerulernerat misigisimavarput, sulili aqqutissaq takivoq.
- UNICEF Kalaallit Nunaannip suliniutaanik allanik peqateqarnikkut, pilersaarusiukkanik suliatigullu qaammarsaanikkut ineriartortitseqqinnissara qilanaareqaara, Maliina Abelsen tusagassiuutinut nalunaarummi oqarpoq.
Taassuma Sara Olsvig ukiuni kingullerni marlunni suliniutinut pisortaasimasoq taarsissavaa. Taannami Ph.d-mik suliaqartussanngornini pissutigalugu suliniutinut pisortaajunnaalerpoq.
Sara Olsvig Inuit Ataqatigiit sinnerlugit Naalakkersuisunut Inatsisartunullu ilaasortaasimavoq.