Maliina Abelsen: Tunniutiinnaranilu uteriittuunissaq pisariaqarpoq
Naalakkersuisut siuliisa aqutsisoqatigiit innersuussuteqaqqullugit pilersippaat, taakkualu suliniutit arfinillit pingaartillugit tunniussaqarfigaat, soorlu ukua: Isummanik allanngortitsinissamik siunertaqarluni paasisitsiniaanerit, Kalaallit Nunaanni meeqqanut siunnersuisoqatigiinnik pilersitsisoqarnissaa, meeqqat kinguaassiuutitigut atornerlunneqartut katsorsarneqartarfissaannik pilersitsinissaq, meeqqat inuusuttuaqqallu ornittagaat kiisalu isumaginninnikkut sullissisut ilinniarteqqittarnissaat innersuussutigineqarput. Aningaasat 25 millionit koruunit sulinermut atorneqartussanngorlugit naalakkersuisunit immikkoortinneqarput. Aningaasat Naalakkersuisumit Maliina Abelsenimit naammagineqarput, sullissisussalli aningaasaqartinnissaat neriuutigigaluarpaa.
Tulleriiaarineq taamaattoq pissusissamisoorsoraara. Iliuusissat taamaattut pissusissamisoorsoraakka. Soorunami amerlanerusunik aningaasaliisoqarsinnaavoq, sullissisussalli suliassanik kivitsisussat kikkuussappat? Sulisunimmi ilinniarsimasunik amigaateqarpugut. Atorfiit taakkua inuttarsisinnaasuugutsigit sullissinerput pitsaanerulissagaluarpoq, Maliina Abelsen oqarpoq.
Aqutsisoqatigiit innersuussutaat politikkikkut tulleriiaarneqareerput.
Suliniutit pillugit paasissutissat sukumiinerusut atuagaaranngorlugit saqqummersinneqarput. Atuagaaraq "Meeqqat ilaqutariillu atugarissaarnerunissaat pillugu innersuussutit" piniarneqarsinnaavoq.