Maligiaq Padilla Paartoq 2006-imi ajugaasuuvoq

Qaannat peqatigiiffiat Sisimiuniittoq ulluni pingasuni qaannamik Paartoq 2006-imik taallugu parrutsitsinera ippassaq unnukkut naammassivoq.

Paartoq 2006 tassaavoq, Sisimiut illoqarfittut 250-inngortorsiorneranut atatillugu innuttaasunik nalliuttorsioqatigiititsinermi ukiormanna pereersut pisussarpassuillu ilaannannguat.

Qajartortartut nunatsinneersut nunanilu allaneersut 19-it peqataapput, arnat pingasut, Sisimiormioq, amerikamioq tyskerlu.

Sisimiunit, Assaqutaq, Sarfannguaq, Itilleq Uummannaarsullu aqqusaarlugit ulluni parrunnermi ajugaasuuvoq Maligiaq Padilla, Sisimiuneersoq, atorsimallugit 8 tiimit, 1 minutsi 42 sekundillu. Tulliulluni tikippoq Apollo Zeeb, Uummannameersoq, atorsimallugit 8 tiimit 13 minutsit 11 sekundillu. Pingajuulluni apuuppoq Piitaaraq Janussen, Paamiuneersoq atorsimallugit 8 tiimit, 51 minutsit 13 sekundillu.

Qajaq Sisimiuni siulittaasoq Kaaleeraq Beck oqarpoq ippassaq 25 kilometerimik Itillimit Uummannaarsummi maqiffittalerlugu parrunneq ingerlanneqarmat assut imarlussimasoq taamaattumillu aallartunit 18-init qulit kisimik apuuttut.

Paartoq 2006 Sisimiut timersortarfissuani unnussiuaaqatigiinnermik naggaserneqarpoq.