Maligassiuisut Showimi nersornaasiisoqartoq
Muusap Atuarfia, Saattuniittoq, atuarfik eqeersimaartutut toqqarneqarpoq. Muusap Atuarfia timip atornissaa ulluinnarni atuarnermi nalinginnaasumik pisariitsumillu ilaatilersimavaa. Atuartummi sapaatip-akunnerata ingerlanerani arlaleriarlutik qitittarput, timimullu tamanna iluaqutaanerata saniatigut , atuarfimmi iluarisimaarnermut ataqatigiinnermullu iluaqutaalluni.
Mittarfeqarfiit suliffeqarfik eqeersimaartutut toqqarneqarpoq. Mittarfeqarfiit qullersaqarfiata peqqissutsip, aalanissap ataatsimoornissallu qitiutillugit aallunneqarnissaat 2017 tamakkerlugu toqqarsimavaa. Suliffeqarfiup siunertap ingerlanneqarnissaanut piffissaliisoqarlunilu nukissanik immikkoortitsiviusoq pilersippaa, ukiorlu tamaat ingerlatassanut pilersaarusiortoqarluni.
Inuiaqatigiinni eqeersimalluartumut aamma nersornaasiisoqarpoq, Marie Natuk Nielsen nersornaaserneqarluni. Taassuma timip atorluarneratigut peqqinnerulernissaq innuttaasunut ataasiakkaanut maligassiuisuuvoq.
Nersornaaserneqartut pillugit isiginnaagassiaaqqat pingasut, Peqqinnissaqarfiup nittartagaani Peqqik.gl-imi takuneqarsinnaapput.