"Maligassiuisussaatigaagama" saqqummilerpoq

- Pakkulluta inuulluaqquvugut. Anaanama angajumalu iperarnissaat sapingajavippara. Angutip ilisarisimanngisama tasioraluaraanga, majuartarfitsigut ujaqqanik qarmakkatigut, quasaqisutigullu, uppinnaveersaarluni ammukarniarneq ajornakusooqaaq. Angutip tasiortima ipulluni umiarsuarmut M/S Diskomukaattussaavaatigut, umiatsiaqqamullu orraaqisumut ikinialerama nangiarnaqaaq. Umiatsiaaqqap issoraanut Anniitap sanianut ingitinneqarpunga. Nuluaqqavut inissaqaqqatarput. Nipaaqalutalu ilumoorsaaqaagut, anaanakkuvut sissiukkami majuartarfiit sinaakkutaanni qeqartuarput - anaanagalu alatsaalivara, sooq aallartilerneraanga eqqarsaatigalugu.

Helene, arfineq-marlunnik ukioqarluni, kalaalliaqqallu allat 21-t, qallunaatut ilinniariartorlutik 1951-imi aallartitaapput. Ukiup aappaa avillugu qaangiummat Nuummut uterpoq - paasivaali ilaquttamini najugaqarnani, børnehjemimi nutaami, Dansk Røde Korsip sanateqqammersimasaani, najugaqassalluni. Oqaatsit ilitsoqqussani puigorsimavai, meeqqallu allat peqatigalugit qallunaat ileqqui malillugit perorsagaavoq. Kalaaliaqqat nunaqqatiminnut maligassiuisunngornissaat taamani anguniarneqarpoq. Meeqqalli taakku namminneq nunaminni takornartatut inuupput.

Oqaluttuaq taanna Tine Bryldip atuakkiaani, "I den bedste meng"-imi, atuareerparput, aamma filmimi "Eksperimentet"-imi takoreerlutigu. Atuagaq "I den bedste mening" allanneqarmat, filmilu "Eksperimemtet" suliarineqarnialermat, Helene Thiesen paasissutissanut ikiuulluarsimaqaaq.

Namminerlu eqqaamasai atuanngorlugu maanna saqqummersippai, Danmarkimukarnertik, Kalaallit Nunaannut uternertik børnehjemmimilu inuunertik oqaluttuaralugu.

Atuagaq qallunaatut kalaallisullu saqqummissaaq.