Maleruagassat malinneqarput

Kommunimi Kujallermi Inuit Ataqatigiit ilaasortaatitaasa, Narsami kommunaldirektørimik attaveqaqatigiinnissamut pisortassatut atorfinitsitsisoqarneranik kammalaatersorneraanerat ikaarsaariarnermut ataatsimiititaliami siulittaasup tulliata Kiista P. Isaksenip akerlilerpaa, oqarluni atorfiit nittaarsaanneqarnerat atorfinitsitsinerillu

maleruagassat malillugit inuttalersorneqarsimasut.

- Pisortassanik atorfinitsitsinerit kammalaatersornermik taaneqarnerat uanga sakkortuumik akerlilerpara. Atorfiit nittarsaanneqarput, aamma taanna pinnginnerani Namminrsornerullutik Oqartussat paasiniaavigivarput, tassanilu aporfissaqartinneqanngimmata uku saqqummiussinissamut inatsisit malitassat aallaavigalugit nittarsaanneqarpoq, Kiista P. Isaksen oqarpoq.

Inuit Ataqatigiit sinnerlugit kommunimi kujallermi ilaasortaq Ingemann Dorph oqarpoq, ullut qulingiluat missaannaanni atorfiit nittarsaanneranut piffissaliussaq sivikippallaarlunilu tuaviuussaavallaartoq.

-nittarsaassineq kommunip nittartagaani takuneqarsinnaagaluartoq, Inuit Ataqatigiinnit isumaqarpugut nittarsaassinerit atuagassianiittut, soorlu Atuagagdliutini Sermitsiamilu, sinerissamut anngutinngitsulluunniit atorfinitsisoqarnera nammaginanngitsoq, tassa taannarpiaq pillugu uparuaavugut, Ingemann Dorph nassuiaavoq, nangillunilu:

- Qinnuteqaqqusilluni nittarsaassineq piffissaq sivisunerulaartoq atorlugu suliarineqarsinnaagaluarpoq, peqqutigalugu juulip aallaqqaataani taakkua atorfinittussaammata, tassalu aatsaat juunip aallartilaartoq ataatsimiilluta, tassa juunip 11-anni. Taamaammat periarfissaqarluaraluarpoq kommune ataatsimiiffissaasa ulluisa allanngortinneqarsinnaaneranut, Ingemann Dorph oqarpoq nangillunlu:

- Qinnuteqartut qassiuneri paasisimanngikkaluarparput, uanili atorfinnut neqeroortitsineq allanittaaq takuneqarsinnaallunilu amerlanerit qinnuteqarnissaannut periarfissiisimagaluarpat tamanna kusanarnerusimassangaluarpoq, kommune kujallermi Inuit Ataqatigiit sinnerlugit ilaasortaq Ingemann Dorph isornartorsiuinerminnut tunngavilersuutertik pillugu oqarpoq.

Ikaarsaariarnermi ataatsimiititaliami siulittaasup tulliata Kiista P. Isaksenip, pisortassanik atorfinitsitsinermi Inuit Ataqatigiit kammalaatersorneraanerat akerlilerpaa oqarluni, pisuutitsineq taasariaqanngitsorluunniit, atorfiit suulluunniit suliakkiutigineqartut illersugaasumik suliarineqartarmata.

- Sunaluunniit atorfi piumasaqataatitaqarluni nittarsaanneqaraangat naammassineqaraangallu atorfinitsitsinermi suliakkiissutigineqartarput. Uani pisortassanik atorfinitsitsinermi Inuit Ataqatigiit kammalaatersornerat sakkortuumik akerlilerpara, pisuutitsiniarnerlu tamanna taasariaqanngitsutulluunnit isigigakku, Kiista P. Isaksen oqarpoq,

- sunami tamarmi illersugaaffeqarpoq, eqqunngitsuliortoqarpammi kinaluunniit pisinnaatitaaffeqarpoq suliassanngortitsisinnaalluni, kattuffeqarpoq, Ombudsmandeqarpugut aamma kommunit nakkutilliisoqarpoq, Kiista P. Isaksen oqarpoq, nangillunilu: Isumaqarpunga partiit tamarmik nuannaarutigiinnartariaqaraat kommunini pingasuusuni atorfiit inuttassarsiuunneqartut pikkorissunik piukkunnartunik piginnaasaqarluartunillu inuttalersorneqarmata.