Maldivani præsidenti innuttami nunassaannik piserusuppoq
Nunarsuarmi silap kiatsikkiartornerata kinguneranik nunarsuatsinni imarsuit qaffakkaluttuinnassappata, taava nunani pukkitsuni innuttaasut qanoq iliussappat? Indiap imavittarsuani qeqertani ataatsimoortuni Maldivani præsidentip Mohammed Nasheedip qanoq iliussalluni nalunngilaa.
Allattoq Louise M. Kleemann
novembarip 12-at 2008 08:02
Tassami nunarsuarmi nunat ilaannik piserusuppoq innuttani nunassaarutinnginniassammata, dr.dk-mi aturneqarsinnaavoq.
- Nunassatsinnik aningaasaleerusuppugut. Tassami qimaasunut inissiivilianiikkusunnginnatta, præsidenti oqarpoq, taamatullu nunasisinnaanissani Indiamut Sri Lankamullu nalunaarutigereersimavaa.
Qeqertat ataatsimoortut Maldiverne qeqertaaraapput 1.200-nik amerlassusillit, 253.000-inillu innuttaqarlutik. Tamaani takornariat milliard koruunerpassuarnik aningaasarsiutigineqartarput.
