Malaria Danmarkimi atugaalersinnaavoq

Silasiortut siulittuutaat naapertorlugit kiatsikkaluttuinnassappat, nunani kiattuni nappaat malaria silaannaap allanngoriartornerata kingunerisaanik Danmarkimi atugaalersinnaavoq.

Danmarkimi silaannaq kiatsinneruppat ippernat malariap uumasuaraanik miluuttumik ingerlatitseqqissinnaasut uumanissaannut periarfissarissaarnerulissaaq. Aamma uumasuaqqat miluuttut uumanissaat periarfissarissaarnerulissaaq. Taama oqaluttuarpoq Flemming Conradsen malariamut immikkut ilisimasalik.

- Uumasuaqqat miluuttut ippernami ineriartussappata kiassuseq aalajangersimasoq pisariaqartinneqarpoq. Kiassuseq naammaginanngippat ippernaq uumasuaqqanik tunillaassuitinnani toqoreersimassaaq, taamaalilluni silaannaap kiassusaa apeqqutaasarpoq, Conradsen oqarpoq.

Ullumikkut Danmarkimi malariap uumasuaraanik soqanngilaq. Taamaattorli malariap uumasuaraanik tunillatsissimasunik Danmarkimut pisoqarsinnaalluarpoq, tassami aatsaat taama pisoqarpat ippernat tunillaassuisinnaalissammata.

- Inuit nunanut malariamik napparsimaffiusunut angalasartut malariap uumasuaraa nassataralugu angerlarsinnaapput, taamaattumik inuit kissarneqarlutik angerlamut tikittut nakorsanit eqqumaffigineqartariaqarput, Flemming Conradsen oqarpoq.

Kisianni Danmarkimi nappaatip tunillaassuutilernissaa ernummatissaanngitsoq oqaatigaa. Tassami peqqinnissamik isumaginninneq pitsaasuummat illullu imminnut ungasinngitsumik sananeqartarmata.

Malariamik Danmarkimi nappaalasoqalissappat, tamanna siulliunavianngilaq. Tassami 1800-kkunni malaria atugaaqaaq. Lolland-Falsterimi innuttaasut 40 procentii taamanikkut tunillatsissimapput. Aamma kuuk Københavnip qeqqani tatsinut kuuttoq ippernanut malariap uumasuaraanik tunillaassuisunut uumaffiusimavoq kingulleq.