Makrelilerngusaanneq Islandimut akornutaasinnaavoq
Immap kissarnerulernera pissutaalluni aalisakkat makrelit Islandip eqqaaniilersimapput, taamaattoqarneralu "makrelilerngusaannermik" kinguneqarpoq.
Islandip aalisartui makrelerpassuarnik pisaqamapput, pisaqamanerallu aalisartunit Skotlandimiunit, Irlandimiunit aamma Norgemiunit akerlerineqalersimasoq, Ritzaumi paasissutissiissutigineqarpoq.
Taamaattoqarnera EU-p aalisarnermut kommisæriata, Maria Damanakip nuannarinngilaa.
- Islandip EU-mut ilaasortaanissamut isumaqatigiinniarneri taamaattoqarnerata akornusersinnaavai, nunanut ilaasortanngorniartunut kommisærimut, Damanaki allakkamini allappoq, nangillunilu:
- Islandimi aalisarnerup ajalusoorujussuarnissaa kikkunnit tamanit illersorneqarsinnaanngilaq.
EU-mut ilaasortanngorniarluni isumaqatigiinniarnerit julip qaammataani aallartinneqarput.
Islandip aningaasaqarniarnerata ajalusoorujussuarnerata kingorna EU-mut ilaasortanngornissaq kissaatigineqalerpoq.