Makka Kleist: Qullissat nunatta oqaluttuarisaaneranut pingaaruteqartorujussuuvoq
Takutitseqqaarnerlumi allamik tulluarnerusumi takutinneqarsinnaagunanngilaq, tassa Qullissani katersortarfitoqqami, 1972 tikillugu illoqarfiup nipilersortartuisa tusaamasat, Hawaii-kitaarilerlutik stylofonilerlutillu, nuannersunik taallalinnik nipilersortarfigisarsimasaanni.
Isiginnaagassiamik allattuusoq, Makka Kleist, Qullissani inunngorpoq peroriartorlunilu. Taanna tusintilippassuit pinngitsaalisaallutik nuutsinneqartut ilagaat, qularutiginngilaalu illoqarfiup Københavnimi aalajanngerneqartumit matuneqartup oqaluttuassartaa annernartulik, ullutsinni kalaallinut aamma oqariartuutissartaqartoq.
- Qullissat nunatta oqaluttuarisaaneranut pingaaruteqartorujussuuvoq. Qullissat inoqarsimanngitsuuppat kulturikkut, nipilersornikkut sulisartullu noqqaaqatiginnissinnaanerat angusaqarsimanavianngikkaluarpugut. Qullissarmiut imminnut ataqatigiittorujussuupput, qularnanngitsumik nunatsinni tamanit nunaniillu allanit aggersuugamik.
Qullissara nunarsuarmioqataasut illoqarfimmi inuunerup ajunngitsortai ajortortaalu pillugit oqaluttualiaavoq. Makka Kleistillu neriuutigaa, isiginnaartitsissut nunatsinni tamani ukiarumiit isiginnaarneqarsinaalerpat isiginnaaartut, maattutigisuseq kulturikkullu aassigiiaarneq misigissagaat.
- Isiginnaagassiaq takugunikku nuannisaartussaapput. Neriuutigaaralu inuusuttut oqaluttuarisaanerput pillugu paasisaqarfigilluarumaaraat. Qullisaniinnarmi pisoqanngilaq. Sumiiffippassuarnimi inunnik 60-kkunni 70-kkunnilu pinngitsaaliilluni nuutitsisoqarpoq inueruititsisoqarlunilu, inuit tarnimikkut anniaatigeqisaannik. Nunaqarfiit inulissuunngitsut pinngitsaaliinikkut inueruitsitaallutik, amerlasoorpassuit tarnimikkut ikilerneqaatigisaminnik, Makka Kleist oqarpoq.
Taavalu nipilersornertaa, isiginnaartitsineq tamakkerlugu kissalaartumik ataqatigiisitsisoq. Erinarsortartut nalitsinni pikkorinnerit ilaat, Mike Fencker Thomsen, Kimmernaq Kjeldsen Pilu Noahsenilu inuusuttunik qitikkuminartunik nipilertsortunik ingiallorneqarlutik, Vaigatimeersunik 60-ikkunni nipilersorneqartartut atorpaat. Nipilersukkat, suli ullumi nuannarineqaqisunik taallallit.
- Taamani talliullaqqittorsuupput. Uummatinut anniaatinullu tunngasunik talliullaqqeqalutik. Kalaallitoqqiinnaaq taalliortarput. Inuusuttut maannakkut taalliortarput danskisut akoorisorujuussullutik. Taamanilu aamma erinniortarnerat allaaneruvoq, erinnat soorlu qalipaatersuinnaaraalluunniit, Makka Kleist Nunatta Isiginnaartitsisarfianeersoq oqarpoq.
