Makivik ukiunik 35-inngortorsiulerpoq

Makivik ukiaq manna nalliuttorsiortussaavoq tamannalu pillugu Nunaviup oqaluttuassartaata ilaa imaattoq tusarliutissavarput.

Kuujjuarmiut Charlie Watt aamma Mark Gordon Canadami naalakkersuisunik nunallu immikkoortuani oqartussaasunik ukiut 35-t matuma siorna isumaqatiginninniarnertik naammassivaat. Taamani Inuit nunamik piginnittunngorput Nunavimmiullu taarsiivigineqarnissaat angullugu. Isumaqatigiinniarnerup kinguneranik ingerlatsivik Makivik pilersinneqarpoq.

Ukiut 35-t taakku ingerlaneranni Nunavimmi inuuneq allanngorsimaqaaq. 1975-imi Inuit Nunavimmiittut 6.000-iinnaapput maannali 11.000-inngorsimallutik. Taakkua nuna nunatta tallimararterutaatut angitigisoq nunagaat.

Inunnut taarsiissutaasunik aqutsinermi saniatigut Makivik arlalissuarnik suliassaqarpoq. Taarsiissutigineqartullu maanna annertuumik pissarsiaqaataapput. Makiviup timmisartuutileqatigiiffiit marluusut piginneqataaffigai, takornariartaammik umiarsuaateqarluni, suliffeqarfinnik arlalinnik ingerlataqarluni, soorlu takornariartitsinermik tammajuitsussarsiniarlunilu piniartitsisarnermik ingerlatsisunik.

Tamakkua saniasigut Makivik akunnittarfinnik, tiinik pinnersaatinillu tuniniaavinnik puisillu amiinik atisalianik ingerlatsivimmik pigisaqarpoq.

Tamakkuninngalu pingaaruteqarnerusumik Makiviup, siulittaasumit Pita Aatamimit aqunneqarluni, Nunavimmi naalakkersuinermik ingerlatsinerup ineriartortinneqarnera aqutarivaa.

Makivik taamatut aqutsisoralugu Nunaviup 2013-imi namminersulivitsinneqarsinnaanera neriuutigineqarpoq.

Nalliuttorsiorneq qaammat tulleq aallartinneqassaaq. Quebecip naalakkersuisuisa Nunavimmilu nunaqarfiit 14-iusut pisortatigoortumik tamanna malunnartissavaat.

Marianne Stenbækip Canadamit ilanngutassiaa taama imaqarpoq.