Makivik Nunavimmi ingerlalluarpoq
Makivik Corporation, Nunavimmi politikkikkut aningaasarsiornermullu tunngasunik suliaqartoq nunaqarfimmi Umiujaq-mi ukiumoortumik ataatsimeersuaqqammerpoq.
Makivik-up ingerlatai – Nunavimmi takornariartitsineq, assartuineq, sanaartortitsineq aamma timmisartuuteqatigiiffik Inuit Air – kingumut sinneqartoorluarfiusimapput.
Ataatsimiinnermi qilalukkat qaqortat aamma eqqartorneqangaatsiarsimapput, tassani oqartussat qaqortat Nunaviup sineriaani amerlassusaannut naleqqiullugu pisassat killilersorneqarnerat uparuartorneqarluni.
Uparuaanerminnut tunngavigaat, Nunavimmiut qilalugaqassutsimik ilisimasaannik tunngaveqarnatik, ilisimatuut nalunaarusiaat, qilalugartassat amerlassusilernerannut tunngavigisimammassuk. Taamaammat qilalukkat qaqortat killilersugaanerannut tunngatillugu piniartut ilisimatuullu suleqatigiinneruleqquaat.
Makivik Corporationip suliniutissamisut tullertut aamma akileraarutit ulluinnarnilu inuuniarnermi akit atuuttut, Canadap sinneranut naleqqiullutik qaffasinneroqisut appartinnissaat.
Nunavimmi inuuneq isumaginninnerup tungaatigut aamma ajoreeqisoq, pitsanngorsartuarniarlugu pimoorullugu suliniuteqarfigineqassaaq.
Makivik Corporationimi Pita Atami præsidentitut ingerlaannassaaq, Michael Gordon tullersortitut toqqarneqarpoq, akisussaaffigissallugit Nunavimmi aningaasarsiornermik inerisaaneq, ilaatigut Kalaallit Nunaannik niueqateqarnerup annerulernissaanik suliniuteqarnissamik ilaqartoq.
