Maerskimiit 280 millioninik taarsiiffigeqquvoq
Angutip amerikamiup umiarsuaatileqatigiiffik Maersk Line 50 millionit dollarinik, tassa 280 millionit koruuninik, eqqartuussivik aqqutigalugu akiliisussanngortinniarpaa. Amerikamiu taanna isumaqarpoq umiarsuaatileqatigiiffimmit eqqunngitsumik soraarsitaasimalluni, kinguaassiuutimigullu Korea Kujallermi politiinit atornerlunneqarnermi kingorna nakorsamit ikiorneqarnissaminut ikiorserneqarsimannginnami. Aviisimi The Virginia Pilotimi tamanna allaaserineqarpoq.
50-inik ukiulik oqaluttuarpoq, tamanna 2008-mi pisimasoq, umiarsuarmit suliffigisaminit sulinngiffeqarallarluni Korea Kujallermiiinnermini. Amerikamiu taanna Maersk Linemit kingorna soraarsitaasimavoq, angutillu unnerluutiginninnera akueriumanngilaat.
- Unnerluussummi uppernarsaatissat piumasaqaatillu imminnut assortuupput. Eqqartuussinerullu aallartinnginnerani unnerluussutit arlallit eqqartuussivimmit akueriumanngilavut, Maersk Linemi oqaaseqartartoq, Kevin Speers, tusagassiuutinut nalunaarummini oqarpoq.
Amerikamiu unnerluussummini oqarpoq umiartoqatini sisamat allat peqatigalugit umiarsuarmit Maersk Rhode Islandimit sulinngiffeqarlutik Korea Kujallermi illoqarfimmi Yosomiissimallutik. Tassanilu nerillutillu imigassartorsimallutik.
Oqaatigaa kingusinnerusukkut qimarngussaasimalluni, angutillu arlallit politiitut atortut kinguaassiuutimigut atornerloriarluni umiarsuarmukaassimagaanni.
Aamma oqaluttuarpoq umiarsuup naalagaa naapissimallugu pisunillu oqaluttuullugu, nakorsamillu ikiorneqarnissani pisariaqartikkini. Umiarsuulli naalagaanit oqarfigineqarpoq, pisoq kalerriunneqaraluarpat Maersk Linep amerikamiut sakkutuuinut attaveqarneranut tamanna navianartorsiortitsilersinnaasoq.
Unnerluussummi oqaatigineqarpoq angut "aalakoormat" soraarsinneqartariaqarsimasoq.
Amerikamiu USA-mi napparsimmavimmi kingusinnerusukkut misissorneqaraluarpoq, piffissarli sivisuallaarsimammat pinngitsaalillugu kinguaassiuutimigut atornerlunneqarsimanersoq takuneqarsinnaasimanngilaq.
Nutaarsissaqartitsivimmi Ritzauimi allaaserineqarpoq, pisoq uani sapaatip-akunnerani ingerlanneqassasoq.
