Maersk Oil ukiut pingasut aatsaat qaangiuppata qillerilissaaq
Skotlandimiut nukissiuutinik ingerlatseqatigiiffiat Cairn Energy PCL taamaasilluni Baffinip kangerliumarngani Nunatta Kitaata avataaniittumi unammillerteqaleqaaq. Naalakkersuisut Aatsitassanullu Naalakkersuisoqarfik uuliasiornissamut qillerinissanullu akuersissutit ippassaq agguaappaat.
Uuliasioqatigiiffissuit uku akuersissutinik tunineqarput: Shell GDF Suez, Statoil, ConocoPhillips, Cairn Energy, Maersk Oil aamma Dong Energy, aammalu akuersissummik tunineqartunut ilaavoq Nunaoil A/S, akuerisaasunut arlalinnut suleqataasussaq.
Uuliasiorfissaq 71.000 kvadratkilometerisut annertutigisoq taakku agguarpaa, aatsaavissuarlu Maersk Nunatta avataani uuliasioqataalerpoq.
- Uuliasiornissamut akuerineqarnerput assut iluarisimaarparput. Nalunngilarput teknikkikkut atortorissaarutigut nassaarnissamullu tamaviaarusussuseqarnerput qaqugu aningaasarsiorluarfigisinnaalerumaarlugu, Maersk Oilimi misissuinernut atatillugu pisortaq Lars Nydahl Jørgensen Ritzauimut oqarpoq.
Peqatigitillugu Maersk Oilip oqaatigineqarpoq, soorunami Kalaallit Nutaata imartaata mingutsinneqannginnissaata pingaassusia ilisimalluaritsik, taamaattumillu akisussaassusilimmik uuliasiorumaarnertik qulareqqunngilaat.
- Misissueqqaarnerit pereerpata aatsaat ukiut pingasut tallimallu akornanniittut qaangiuppata qillerisinnaalerumaarpugut, avatangiisinut tunngasut tamaasa misissuiffigeerlugit nalilersuereersimalerutta, Maersk Oil nalunaarpoq.
Baffinnip Kangerliumarngani gassimik uuliamillu qalluisinnaalernissaq anguniarlugu misissuiniarlutik uuliasioqatigiiffissuit qinnuteqaataat Aatsitassanut Naalakkersuisoqarfiup aamma Naalakkersuisut ullumi maanna akuersissutigaat.
Inuussutissarsiornermut aamma Aatsitassanut Naalakkersuisoq, Ove Karl Berthelsen oqarpoq, uuliasiortitseqatigiiffiit taama amerlatigisut soqutiginninnerat nuannaarutigisariaqartoq.
- Neqeroortitsinerup inernera Kalaallit Nunaanni inuiaqatigiit aningaasaqarneranni piujuartussamik angusaqarnissamut alloriarneruvoq pingaaruteqartoq, taamaattumik piginnaatitsisummik pigisaqartut Kalaallit Nunaanni uuliasiornermi periarfissanik misissuinermi isumannaatsumik naapertuuttumillu peqataanissaat tatigilluinnarpara. Aamma sillimaniarneq pitsaalluinnartariaqarpoq suliaqarnerisalu inernerinik malinnaanissamut qilanaartorujussuuvunga, Ove Karl Berthelsen oqarpoq.
