Macronip Frankrigimi innuttaasut angerlarsimaannaqqugai
- Peqqinissarput pillugu akiuunnermiippugut, Frankrigip præsidentia Emmanuel Macron tv-kkut aallakaatinneqartukkut ataasinngornermi unnukkut oqalugiarami ilaatigut taama oqarpoq.
Coronavirusimik akiuiniarnermut atatillugu oqaaseq "akiuunneq" arlaleriarluni atorpaa.
Frankrigimi innuttaasut angerlarsimaannarnisssaannut kaammattuivoq, aatsaallu pisariaqarluinnarpat anisarnissaq kajumissaarutigalugu. Malittarisassat tamakku malinneqanngippata pillagaasoqarsinnaasoq, Macronip oqaatigaa.
Inuit naatsiiviliarsuarni katersuunnerat isornartorsioraa
- Frankrigip sorsunneqannginnerup nalaani taama alloriartariaqarnera immikkuullarippoq, præsidenti oqarpoq.
Frankrigimi imerniartarfiit neriniartarfiillu sapaatiummat matummata inuit niuffaffinni naatsiiviliarsuarnilu katersuunnerat Macronip ilanngullugu isornartorsiorpai.
- Imminut illersunngilasi, allallu illersunngilasi, Macron oqarpoq.