Macron: Kalaallit Nunaat tuniniagaanngilaq

Nunarsuarmi imarpiit illersorneqarnissaat pillugit Naalagaaffiit Peqatigiit ataatsimeersuartitsinerani, ullorornerani ammaanersiornermi oqalugiaammini Franskit præsidentiata Kalaallit Nunaat tapersersorpaa.

Allattoq Christine Hyldal

juunip 09-at 2025 12:03

Nutserisoq Karla Heilmann

- Kalaallit Nunaat tuniniagaanngilaq, taamatuttaaq sikuiuitsoq kujalleq imarpiillu – tuniniagaanngillat.

Nunarsuarmi imarpiit illersorneqarnissaat pillugit Naalagaaffiit Peqatigiit ataatsimeersuartitsinerani, Franskit præsidentiata Emmanuel Macronip ullumi ammaanersiornermi oqalugiaatimini oqarpoq. Ataatsimeersuarneq Nicemi pivoq.

Taamak tusagassiorfik Politico allappoq.

Oqaaseqaat amerikamiut præsidentiata Donald Trumpip, Kalaallit Nunaat aqulerniarlugulu tigusinissamik isummersornera pillugu tusangiasaarutaalluinnarpoq.

Emmanuel Macron said Monday that Greenland is "not for the taking" in a not-so-veiled swipe at Donald Trump's continued threats to annex the Arctic island.https://t.co/fzC2kPxRhp
— POLITICOEurope (@POLITICOEurope) June 9, 2025

Macron qallunaat ministeriunerat Mette Frederiksen peqatigalugu sapaatiuppat tikeraassapput. Naalakkersuisut siulittaasuat Jens-Frederik Nielsen (Demokraatit) naapissavaat, Politicolu naapertorlugu taakkua pingasuullutik, Atlantikup Avannaani Issittumilu isumannaallisaaneq, silap pissusiata allanngoriartornera, nukissiuutit aamma aatsitassat qaqutigoortut pillugit oqaloqatigiissapput.

Aamma atuarukTusagassiutit: Frankrigip præsidentia Macron Kalaallit Nunaannut tikeraarniartoq

Macronillumi Kalaallit Nunaannik tapersersuinini ersarilluinnartumik takutippaa. Tassunga tunngatillugu ilaatigut Frankrigimit oqaatigineqarpoq, Donald Trumpip kimigiisernera akiorniarlugu, Kunngeqarfik Danmarki qinnuiginnissappat, Frankrig Kalaallit Nunaannut sakkutuuliinissaminut piareersimasoq.

Vivian Motzfeldt qaaqqusisoq

Nunanut allanut naalakkersuisoq Vivian Motzfeldt (S), maajimi Frankrigimut tikeraarpoq, tamatumunngalu atatillugu Kalaallit Nunaannut tikeraarnissamut qaaqqussissut tunniullugu.

Trumpip ukiup aallartinnerani ilungersuatitsinerani, Frankrigip tapersersuisimaneranut Vivian Motzfeldtip tikeraarnermini qutsavigai.

Franskit timmisartortartut Airbus A400M-imik Kalaallit Nunaannut minnissaannik ukiup aallartisimalernerani sungiusarneqarput. Sermeq apullu pissutigalugit aqqutissaanngitsukkut millutillu qangattarnissaat siunertaralugu sungiusarneqarput.

USA-p nunatsinnik aqutsilernissamik kissaataa

USA-p Kalaallit Nunaat pigissagaa isumaqarluni, Donald Trump 2024-mi decembarip 23-ani oqaaseqarpoq. Oqariartuut tamanna taassuminnga sulisuiniillu arlaleriarlugu uterneqarpoq.

Donald Trumpip ernera angajulleq, Donald Trump Jr. Nuummut januaarip arfineq-aappaani tikippoq, tamannalu nunarsuarmit nunarput ukkatarineqalerneranik kinguneqarpoq.

Præsidentinngortussap aningaasaqarneq sakkutuulersornerlu atorlugit Kalaallit Nunaat aqunniassanerlugu mattunnagu ulloq taanna oqaatigaa, aamma naak USA Danmarkilu tamarmik Natomi ilaasortaagaluartut USA-lu nunatsinni Sorsunnersuup Aappaanili sakkutooqarfeqaraluartoq.

Præsident Trumpip Kalaallit Nunaat tiguarniarneraa marsip 13-ianni aperineqarpoq. Taassumalu: - Taamaattoqarnissaa ilimagaara, akissutigaa.

Nuummiut USA-p nunatsinnik tiguserusunneranut akerliullutik marsip 15-ianni akerliussutsiminnik takutitsipput. Nunatta oqaluttuarisaanerani akerliussutsimik takutitsinerit annerpaartarigunarpaat.

Oqallittoqangaatsiarnerata aamma akerliussutsimik takutitsiniartoqarnerata kingunerisaanik Amerikamiut præsidentiata tullersortaata, J.D. Vancep nuliata Sisimiunut tikeraarnissamik pilersaarutini taamaatippai. Taarsiulluguli aappariit marsip 28-anni Pituffik Space Basemukarput, tassanilu tusagassiortunik katersortitsisoqarpoq.

The New York Timesip Amerikamiut kalaallinut USA-mut ilanngutsitsiniarnissamut - matumani pissaanermik sakkukitsumik aamma namminersortunut aningaasaliissuteqarnikkut soqutiginnitsitsiniarnissamut periusissiaat apriilip qulinganni saqqummiuppaa.

Amerikamiut præsidentiata isertortumik paasiniaasartut soorlu CIA-mi NSA-mi DIA-milu pisortat Kalaallit Nunaannut tunngatillugu paasissutissanik amerlanernik katerseqqusimavai Wall Street Journalip maajip arfernanni saqqummiuppaa. Tassani kalaallit USA-p anguniagaanut iluaqutaasinnaasut ataatsimut isigineqarsinnaalersinneqassasut ilaatigut peqqussutigineqarpoq. Tamanna pissutigalugu Amerikamiut Kalaallit Nunaannut kilitsissiatut suliaqarsinnaanera immikkut ilisimasallit nunallu arlallit pasivaat.

Angutit Amerikamiut atersineqanngitsut pingasut “akuliuteriaraluarsimasinnaasutut” aamma “sunniiniartutut” tusagaqarfinniit taaneqartut, PET-p DR-illu tusagaqarfii allat aggustip 27-anni uppernarsarpaat. Taakkua nunatta Danmarkillu akornanni eqqissiviilliortitsinissamik siunertaqartumik sulianik ujartuipput. Tamatuma saniatigut nunatta Danmarkimit avissaarnissaanut suliaqartussanik Amerikamiut nunatsinnik tiguaanissaannik ikiuussinnaasunik kalaallit aqqinik allattorsimaffeqarpoq.

USA-p Danmarkimut aallartitaatut toqqagaaqqammersoq Kenneth Howery, nunanut allanut tunngasunut naalakkersuisoq Vivian Motzfeldt (S) peqatigalugu Hans Egedep illuani tusagassiortunik decembarip arfineq-pingajuanni katersortitsivoq. Tassani oqarpoq: - Uagut (USA, aaqq.) kalaallit siunissaminnik namminneq aalajangiisinnaanerat ataqqivarput.

Præsidentip Louisianami guvernøri Jeff Landry Kalaallit Nunaannut immikkut aallartitassatut decembarip 22-anni toqqarpaa. Kalaallit Nunaata USA-mut ilanngunneqarnissaa anguniagaralugu, guvernørip nammineq oqaatigaa. Præsidentip Kalaallit Nunaata USA-mut ilanngunneqarnissaannik kissaateqarnini ulloq taanna oqaatigeqqippaa.

Donald Trump New York Timesimut 2026-mi januaarip arfineq-pingajuanni oqarpoq, Kalaallit Nunaata pigilernissaa 'eqqarsartaatsikkut iluatsilluassagaanni pisariaqartoq'. Kalaallit Nunaannik piginnittuuneq imaluunniit USA Natomi ilaasortaanissaa 'aalajangigassanngorsinnaasoq', oqaatigaattaaq.

Allisiguk

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.