"Macbeth" Katuami arfininngorpat isiginnaartitsissutigineqassaaq
Isiginnaartitsissusiortorsuup William Shakespearep isiginnaagassiaa ”Macbeth” Kalaallit Nunaanni isiginnaartitsissutigineqalerpoq, isiginnaartitsisartoqatigiit Silamiut isiginnaartitsinialeramik.
Tamanna Katuami sapaatip-akunnerata naanerani pissaaq. Shakespearep suliaasa ilaannik kalaallisut nunatsinni aatsaat isiginnaartitsisoqalerpoq, sineriammilu ilinniarfeqarfiit ilaanni ilaatigut isiginnaartitsissutigineqassasoq takorloorneqarpoq. Isiginnaartitsissummut ilisarisitsinermut najuuppugut:
Isiginnaartitsisartoq Makka Kleist kisimiilluni isiginnaartitsissaaq, Svenn B. Syrinilu ilitsersuisuulluni.
Isiginnaagassiaq ”Macbeth” pissaaneqarniarnermut tunngavoq, 1606-imi allanneqarluni. Skotlandip ukioq 1040-miit 1047-mut kunngia Macbeth oqaluttuami qitiuvoq.
Isiginnaagassiaq tuluttuumiit kalaallisuumut Henriette Rasmussenimit nutserneqarpoq, oqaasertassallu ilaat Moses Olsenimit taalliareqqinneqarsimallutik.
”Macbeth” Katuami Inersuaaqqami arfininngorpat unnukkut nalunaaqutaq arfineq-pingasunut qiteqquppat isiginnaartitsissutigineqaqqaassaaq.