Macbeth kalaallisut isiginnaartitsissutigineqarpoq

Katuap isiginnaartitsisarfiani minnermi sapaatip akunnerata naanerani Kalaallit Nunaata oqaluttuarisaanerani perngaammik – William Shakespeare-p isiginnaagassialiaa kalaallisut oqaasertalerlugu isiginnaartitsissutigineqarpoq.

Isiginnaartitsisartup Makka Kleistip akunneq naallugu Shakespearip isiginnaartitsissusiaa Macbech takutippaa. Sapaatip akunnerata naanerani isiginnaartitsissut marloriarlugu takutinneqarmat isiginnaariartuni akuupput meeqqat, inersimasut utoqqaallu. Isiginnaartitsissutigineqartumi pissanganartumik oqaluttuarineqarput kusanarumatussuseq pissaaneqarusussuserlu.

Sermitsiap nittartagaani tusagassiortup Pipaluk Høeghip isiginnaartitsissut nalilerpaa ” misigisatut qiimmaallannartutut. Aamma allappoq Makka Kleistip kisimiikkarluni torrallaalluinnarluni Macbeth uumassuseqartillugu isiginnaartunut nerliutigingaa. Pipaluk Høeghip aamma Makka Kleist nersualaarpaa kisimiilluni akunneq ataaseq naangajallugu unigani oqalummat. – Shakespeare kalaallisut tusarlugu alutornaqaaq, Pipaluk Høegh Sermitsiap nittartagaani allappoq.

Danskit Shakespearimik nuannarisaqartut peqatigiiffiani siulittaasup, Søs Haugaardip nuannaajallaatigeqaa tusarlugu Shakespeare kalaallisuunngortinneqarsimasoq. – Shakeapeare uumasuuguni nuannaajallassimaqqooqaaq, Søs Haugaard oqarpoq.

Isiginnaartitsisartut Silamiut pilersaarutigaat Aasianni; Qaqortumi Sisimiuni Macbeth isiginnaartitsissutiginiarlugu.