Maarmoriliup ammarnissaa aningaasarsiornikkut ajornartorsiornerup kinguarsarpaa
Nunarsuarmi tamarmi aningaasarsiornerup pitsaannginnerata kingunerisaanik zinkissap akia affaannanngorsimavoq.
-Tamanna pillugu aatsitassarsiorfiup Black Angel Mining Company-p Maarmorilimmi aatsitassarsiornini apriilip tungaanut unitsikkallarpaa, Jonas Nielsen, Uumamnnameersoq, Maarmorilik Committe-mi ilaasortaq, ilisimatitsivoq.
Maarmorliup ammaqqinnissaa pillugu Uummannami maajip qaammataani atsioqatigiittoqarpoq, peqataasoralugit Aatsitassarsiornermut Naalakkersuisoq Kim Kielsen, aatsitassarsioqatigiit Black Angel Mining Company-p aallartitai aamma Uummannap borgmesteria Jens Lars Fleischer.
Peqataasut tamarmik persuarsiorput, tassami zinkisiorfik aallartilluaruni 85-inik sulisoqassammat, amerlanerpaat nunaqavissuussallutik.
- Suliat arlallit ingerlanneqareerput, soorlu majuartaat schweizimiut piareersareernikuuaat. Aamma ujaqqanik aatsitassanik misissugassanik Tuluit Nunaannut nassiussisoqareerpoq, Jonas Nielsen oqarpoq.
Maannali tassa aatsitassarsiornissap piareersarnera unitsikkallarneqarpoq, nunarsuarmi zinkip akia allanngorarpallaarmat, aningaasaliisartullu akornanni mianersornerujussuaqarmat, Maarmorilik Committee-mi ataatsimiititaliami ilaasortaq oqarpoq.
