Maarmoriliup ammaqqinnissaa atsioqatigiissutigissavaat
Aatsitassanut Ikummatissanullu naalakkersuisoq Kim Kielsen aatsitassarsiorfiullu BLACK ANGEL MINING A/S-ip sinniisui atsioqatigiinnermi aqagu pisussami peqataassapput.
Tamatuma saniatigut aatsitassarsiornermi sapinngisamik kalaallit sulisorineqarnissaat kalaallillu suliffeqarfiisa sapinngisamik atorneqarnissaat anguniarlugu Aatsitassat pillugit Naalakkersuisoq Kim Kielsen, Uummannap Kommunia aamma BLACK ANGEL MINING A/S atsioqatigiissapput.
Zinkimik piiaanerup ukiup naalernerani aallartinnissaa pilersaarutigineqarpoq, sulisullu 100-t missaasa sulisorineqarnissaat naatsorsuutigineqarluni.
Inngili Qernertoq ukiut 17-it zinkimik piiaaffioreerluni 1990-imi matuvoq. Saffiugassanik nutaanik nassaartoqarneratigut kiisalu zinkip aqerlussallu tunisassiarineqarnerisa akitsornerisigut, aatsitassarsiorfiup BLACK ANGEL MINING A/S-ip Inngili Qernertup ammaqqinneqarnissaa imminut akilersinnaassangatippaa.
