Maanna nipertik sukaammisalerpaat
Demokraatineersup Niels Thomsenip Siumup qinigassanngortitai qinersisartunik uukapaatitsinerarlugit maanna uparuarmagit assersuutaasinnaavoq.
Taassumami tupaallaatigaa, nunanut allanut tunngasunut oqartussaaffiup Danmarkimit Nnatsinnut nuunneqarnissaa qineqqusaarnermi Siumup piumasarimmagu.
- Nunanut allanut tunngasunut oqartussaanerup tiguneqarnissaanik Siumup ilungersuutaa, Namminersorluni Oqartussaanermut inatsit naapertorlugu pisinnaanngilaq. Taamatut uteqattaartumik Siumukkut ilungersuutigisaminnik saqqummiusseqattaarnerat qinersisartunik uukapaatitsiniarnermut assingunerusoq, Niels Thomsen oqarpoq, innersuussutigalugulu Namminersornermut Inatsimmi paragraf 11.
Tassani immikkoortut pingajuanni takuneqarsinnaavoq, nunanut allanut sillimaniarnermullu tunngassuteqartut naalagaaffimmit oqartussaaffigineqartut, taamaattumillu Naalakkersuisut oqartussaaffiisa avataaniilluni.
Niels Thomsenip aamma erseqqissarpaa, nunanut allanut tunngassuteqartunik tigusinissaq Danmarkimi tunngaviusumik inatsimmik allannguinermik pisariaqartitsisussaasoq.
Aajuna Namminersornermi inatsimmi immikkoortoq Niels Thomsenip innersuutaa:
"Kapitali 4
Nunanut allanut tunngasut
§ 11. Naalakkersuisut inuiaat assigiinngitsut akornanni pissutsit pillugit iliuuseqarsinnaapput kapitalimi matumani aalajangersakkat naapertorlugit aamma Danmarkimi naalakkersuisut isumaqatigiissuteqarfigalugit.
Imm. 2. Naalakkersuisut Danmarkimilu naalakkersuisut inuiaat assigiinngitsut akornanni pissutsit pillugit Kalaallit Nunaata soqutigisai aamma Danmarkip Kunngeqarfiata ataatsimoortumik soqutigisai isumannaarniarlugit kapitalimi matumani aalajangersakkat naapertorlugit suleqatigiissapput.
Imm. 3. Naalakkersuisut kapitali manna naapertorlugu pisinnaatitaaffeqarnerisa inatsit tunngaviusoq naapertorlugu Danmarkimi oqartussaasut inuiaat assigiinngitsut akornanni pissutsinut akisussaanerat aamma pisinnaatitaanerat killilinngilaa, nunanut allanut tunngasut aamma sillimaniarnermut tunngasunut pillugit naalakkersuinikkut ingerlatsineq naalagaaffiup suliassaqarfigimmagu."
Tusarfik: Nanoq.gl
