Maalaarutit sumiginnarneqartut
Peqqissutsimut naalakkersuisoqarfimmi pisortaq Ann Birkekær Kjeldsen ima oqarpoq:
- Nutaamik aaqqissuussinermut atasumik Napparsimasut Sullinneqarneranni Maalaaruteqartarfiup suliassai isumaginniffimmit nutaamit, Patientombud-imit isumagineqalersimapput. Nunatsinni passunneqarsimasut naammagittaalliuutaat Patientombudimit isumagineqarsinnaanersut qularutigineqarmat, qanittoq tikillugu tamanna ajornartorsiutaavoq.
Taamatut qularuteqartoqarnera pissutigalugu, maalaarutit Nunatsinni nakorsaaneqarfiup ingerlateqqissinnaasimanngilai, taamaattorli Ann Birkekær Kjeldsenip oqaatigaa aaqqiissutissamik nassaartoqareersoq, tassa maalaarutit maangaanneersut Danmarkimi disciplinærnævnimit isumagineqarsinnaammata.
Naalakkersuisoqarfimmi pisortaq ilanngullugu ilisimatitsissutigaa, maalaarutit 70-it Nunatta Danmarkillu akornanni attaveqannginneq pissutigalugu eqqugaasimassasut.
Taamatut attaveqannginnermut kina akisussaanersoq Ann Birkekær Kjeldsenip oqaatigerusunngilaa.
- Oqaloqatigiinnissami marluusariaqartoq ilisimaneqarpoq. Aaqqiissutissamilli nassaarsimagatta nuannaarutigisariaqartoq isumaqarpunga, Peqqissutsimut naalakkersuisoqarfimmi pisortaq Atuagagdliutinut oqarpoq.
