Múte IA-p siulittaasuatut ingerlaqqippoq
Múte B. Egede Inuit Ataqatigiit siulittaasuattut ingerlaqqissaaq.
Tamanna aamma ilimagineqareerpoq unammillertoqanngimmat. Múte B. Egede partiip siulittaasuatut suli tapersersorteqaqaaq.
Tamatuma saniatigut Agathe Fontain aaqqissuussaanikkut siulittaasup tulliatut ingerlaqqippoq.
Partiip folketingimi ilaasortaatitaa Aaja Chemnitz Larsen aamma siulittaasup tulliatut qinigassanngortikkaluarpoq. Kisianni tassa Agathe Fontain ingerlaqqissaaq.
Siornatigut Aaja Chemnitz Larsen-ip aaqqissuussaanikkut siulittaasup tulliatut qinigassanngortissalluni nalunaarutigereernikuuaa. Agathe Fontain-ili qinigassanngorteqqinniarnersoq ilisimaneqarnikuunngilaq.
Piffissaq kingullerpaaq atorlugu Agathe Fontain qinigassanngortippoq.
Agathe Fontain 35-inik qinigaavoq Aaja Chemnitz Larsenilu 33-inik.
Ilaasortat 72-it qinersisinnaasimapput.
Taamaalillunilu Inuit Ataqatigiit nuna tamakkerlugu ulluni pingasuni ataatsimeersuarnerat naammassivoq.
Partiip nuna tamakkerlugu politikkia kommunenilu suliassat aaqqissuunneri, sapaatip ingerlanerani ilaatigut oqallisigineqarput.
Peqqinnissamiit mittarfiliornernut suut tamarmik oqallisigineqarput.
