Múte B. Egede peqqisseqqippoq Mette Frederiksenillu ataatsimeeqatiginissaanut piareerluni
Naalakkersuisut siulittaasuat, Múte B. Egede (IA) coronamik tunillatsissimareerluni peqqisseqqippoq.
Taamaalilluni tunillatsissimanini pissutigalugu ilaatigut ministeriunermik Mette Frederiksenimik ataatsimeeqatiginninnissani kinguartissimasani maanna piareersimaffigilerpai.
Múte B. Egede (IA) sapaatit akunneri marluk matuma siorna Danmarkimut ataatsimiigiarlunilu dronningip nalliuttorsiutigineqarnissaanut peqataajartorluni aallarpoq.
Peqqiilliulerporli. Naalakkersuisut siulittaasuat PCR-imik misissortinnermini tunillatsissimalluni paasisimallugu januaarip ulluisa 13-ianni allappaa. Taamaammat nunami allamiut sinniisuinik arlalinnik ataatsimeeqateqarnissani kinguartillugillu dronningip ukiunik 50-inik dronningiuneranik nalliuttorsioqataanissani taamaatippaa.
AAMMA ATUARUK Múte B. Egede tunillatsissimavoq taamaammat ataatsimiinnissani kinguartippai
Maannali peqqissippoq. Naalakkersuisut tusagassiuutinut nalunaarummi allapput:
- Naalakkersuisut siulittaasuat Múte Bourup Egede coronavirusimik tunillatsinnermi kingorna napparsimajunnaarpoq sulileqqillunilu.
- Sapaatip akunnera una statsminister Mette Frederiksen ataatsimeeqatigissavaa kingusinnerusukkullu tuluit nunanut allanut niueqateqarnermi ministeriat, Ranil Jayawardena aammalu tuluit aallartitaat Emma Hopkins ataatsimeeqatigissallugit, Naalakkersuisut allapput.
