Lærlingit pillugit suleqatissarsiotoqalerpoq
Suliffeqarnermut Inuussutissarsiutinullu ilinniartitaanermut Pisortaqarfiup lærlingit aamma sungiusarluni suliffiit pillugit immikkut sammisaralugu radio, tv aviisillu atorlugit suleqatissarsiorneq sapaatit-akunnerini makkunani ingerlatileruttorpaa.
Suleqatissarsiornikkut suliffeqarfiit amerlanerit Naalakkersuisut ilinniartitaanermi annertuumik iliuuseqarnerannut ilanngullugu lærlinginik tigusaqartalernissaat aammalu inuusuttut sungiusarlutik suliffissaqarsinnaanissaat anguniarneqarpoq.
Oqariartuutigineqarpoq ”Qinnuteqaatit inuttut nammineq allaguk oqaloqatiginninnissamullu piareersarlutit”. Anguniarneqarluni inuusuttut ilinniartitaanermut ingerlakkumasaminnut atatillugu sungiusarlutik suliffigisassaminnik nassaarsinnaanissaminnut periarfissarisamik annertunerulernissaannik ilitsersorneqarnissaat.
Inuusuttut amerlaqisut meeqqat atuarfianniit soraarummiilerput, taamatullu sungiusarlutik suliffigisassaminnik ujaasisussaalissallutik.
Ilitsersuut sungiusarluni suliffigisassarsiortunut sammitinneqartoq sinerissami atuarfinnut Piareersarfinnullu nassiussuunneqarpoq. Paasissutissanik nittartagaq www.nanoq.gl aamma aallerfiusinnaavoq.
