Lynge innersuussisimannginnerarpoq
Aviisip paasissutissanik pissarsiarisimasai naapertorlugit Namminersorlutik Oqartussat sulisussarsiortitsisarfianit Ramsdal A/S-imit attavigineqarsimanngikkaluaruni atorfimmut immaqa qinnuteqarsimassanngikkaluarpoq.
Steen Lyngelli taassuminnga innersuussisisimannginnerarpoq. Radioaviisip ippassaq ullaap tungaa tamaata attuumassutillit tamaasa pissarisiariniarsimagaluarpai, Steen Lyngelli naalakkersuisoqarfiani pisortap kisiartaalluni saaffiginnissummut oqaaseqarumasimavoq.
Ann B. Kjeldsenip uppernarsarpaa Steen Lynge sulisussarsiortitsisarfimmit Ramsdal A/S-imit attavigineqarsimasoq, taava isumaqatigiinneq tassunga killeqarpoq.
-Steen Lynge Ramsdalimut akissuteqarluni oqarpoq Carsten Frank Hansen kinaanersoq nammineq nalunagu, taassumali sulinerminik misilittagai qanorlu ilinniagaqarsimanera ilisimasaqarfiginnginnamiuk atorfimmut innersuussinnaanagu.
Steen Lynge Carsten Frank Hansenimik innersuussisunut ilaasimaneranut tunngatillugu oqaatigineqartut taamaasillutik imminut assortuupput.
Carsten Frank Hansen, Nunatta karsianik aqutsisutut ulluni marluinnarni atorfeqartoq, e-mailit Ramsdal A/S-imit Berlingskemut tunniunneqartut naapertorlugit Aleqa Hammondip naalakkersuisoqarfiani pisortamit Svend Hardenbergimit atorfimmut qinnuteqaqqullugu kajumissaarneqarsimavoq.
- Carsten Frank Hansenip naalakkersuisoqarfimmi pisortatut atorfimmut piukkussatut attavigeqqullugu Svend Hardenbergip toqqaannartumik kajumissaarpaanga, tamannalu tunngavigalugu Carsten Frank Hansen atorfimmut qinnuteqarpoq, Karl-Erik Nielsen, Ramsdal Executive Servicemi pisortaq Berlingske Businessimut oqarpoq.
E-maili Hardenbergip Ramsdalimut nassiussimasaa qulequteqartoq »Aningaasaqarnermut naalakkersuisoqarfimmi pisortatut atorfimmut piukkussat« aviisip pissarsiarisimavaa, Hardenbergili ilaatigut ima allappoq:
- Tusarpara Carsten Frank Hansen atorfimmut soqutiginnittoq. Aamma allappoq taanna Nunatsinnut uteqqikkusuttoq, piukkussamilu mobiilinut marlunnut normut Karl-Erik Nielsenimut tunniullugit.
Aamma allaqqavoq Lars Emil Johansenip Siumumeersoq Steen Lyngellu Atassummeersup Carsten Frank Hansen pitsaasumik oqaaseqaateqarfigalugu innersuussimagaat.
Nunatsinni ombudsmandip naalakkersuisut siulittaasuata naalakkersuisoqarfiani suliat pingasut qaammatip ataatsip ingerlaneriinnaani misissuiffigalugit suliarilerpai. Misissuineq ombudsmandimit suliarineqalersoq kingulleq tassaavoq Carsten Frank Hansenimik atorfinitsinerup qanoq ingerlanneqarsimanera.
