Lundbeckip toqumut pillaanermi nakorsaasiani atoqqunngilai
Amerikami Ohio-mi toqumut pillakkat, ikinnerpaamik 15-nit maanna utaqqipput, iisartakkanik Lundbeckip tunisassiaanik nutaajusunik iisisinneqarlutik toqunneqarnissaminnut.
Amerikamiut aviisiat, The Columbus Dispatch allappoq, Lundbeck-imit toqumut pillakkanut iisartagaatiminnik atuinissarnissaq akerliuffigineqarsimasoq.
Toqumut pillakkanut atorneqartaraluarpoq Sodium Thiopental, Ohio-mili oqartussat aalajangersimapput Lundbeckikkut tunisassiaat, Pentobarbital atortalerniarlugu. Tassalu tamanna pissutigalugu Lundbeckimiit allakkanik USAmut nassiussisoqarpoq tamanna akuerisinnaanagu.
Pentobarbital tassaavoq nakorsanit suliarineqarnermi sinissaat, suliaritinnerup nalaani komartuusinertut sunniuttartoq, taassumalu atorneqarnerani pinngitsoortinneqartarluni qaratsamik silaannaaruttoornerup kinguneranik innarlerneqarneq.
Nakorsaasiorfissuup Lundbeckip USA-mi immikkoortortaqarfiani pisortaanerup tullia, Sally Benjamin Young oqarpoq, allakkat nassiunneqarsimasut kikkunnut tamanut atuagassatut nassiussimanagit. Erseqqissaatigaali nakorsaasiorfissuup Lundbeckip tunisassiai toqumut pillaanermut atorneqartartussaaneri akerleralugu.
- Inuup inuuneranik annaasiniarnermi Lundbeckip suliai atorneqartarput. Toqumut pillaanermi suliagut atorneqartassappata uagut siunertatsinnut tamanna naleqqutinngilaq, Sally Benjamin Young oqarpoq.
