Los Angelesip eqqaani nunami ikuallattoqarnerani inuit 50.000-it qimagussorneqartut

Los Angelesip eqqaani iIkuallattoqarnera inuppassuarnut eqquivoq, pisortammi innuttaasut 50.000-it angerlarsimaffitik qimassagaat piumasaraat.

Nunani tamalaani tusagassiorfiit ilaatigut AFP taama allaaserisaqarput.

Aqqusinersuit assersorneqarput, ikuallattoqarneralu pissutigalugu atuarfiit matoqqatinneqarlutik

Sumiiffinni arlalinni ikuallattoqarpoq maannamulli ajoqusersimasunik nalunaarutiginnittoqarsimanani.

Ikuallaffiup ilaani nuna 5000 hektari sukkalluinnartumik ikuallalersimasoq, qatserisartut oqaatigaat.

Illut arlallit ikualanermit nungutaapput.

Californiami ikuallattoqanerani qatserisartut 500-t missaanniittut helikopterit timmsiartullu qamisaatinneqarput.

- Angerlarsimaffisi massakkut qimassagisigi qinnuigaassi, qatserisartut oqaaseqartartuat taama oqaaseqartoq AFP allaaserisaqarpoq.

AAMMA ATUARUK Orpippassuarni ikuallattoqarnerani inuppassuit qimagussorneqartut

Inuit qimagussorneqarsimasut katersuuffissaannik centerinik pilersitsisoqarpoq, NBC Los Angeles allaaserisaqarpoq.

Californiami ikuallattoqaqqissinnaanera aarlerisaarutigineqareersorlu ikuallanneq aallarteqqippoq.

Sakkortuumik anorlernera, kiarujussuarnera isugutaneralu orpippassuani ikuallattoqaneranut aallarnisaataapput.

Ikuallaffiusup avannaatungani najugallat 180.000-it missaanniittut piareersimaneq pissutigalugu innaallagiaqanngillat, AFP taama allaaserisaqarpoq. Kujataatungaanilu najugalinnut tamanna aamma atuuppoq.

Californiami siornali ikuallanneq aallartimmat aseruatiterujussuarpoq. Inuimmi qatserisartullu 100-t missaanniittut ajunaarput.

Paradisemilu ikuallarujussuartoqarmat inuit 85-t ajunaarput inuillu 50.000-it qimagussorneqarlutik.