Los Angelesimi nersornaatisisorpassuit
Nipilersortartunut erinarsortartunullu Los Angelesimi unnuaq nersornaatinik, tassa grammynik, agguaassisoqarmat, coorborpalaartumik erinarsortartut, Dixie Chicksikkut, ajugaallualaavissorput.
Dixie Chicksikkut piukkunneqarfitik kategoriit tallimat tamaasa ajugaaffigaat, nuutit arlariinnik immiussartallit, coorborpalaartunik erinarsorlutik immiussatik arlallit nuannarineqarnerpaat, minnerunngitsumillumi erinarsuut ukioq-manna nuannarineqarnerpaaq, ”Not ready to make nice”. USA-mi præsidentip, George W. Buship, Irak 2003-mi isaaffiginialermagu erinarsortartut taakku pingasuusut Bushimut akerliunertik isertuutinngivillugu erinarsuut taanna saqqummersippaat.
Arnaq erinarsortartoq nuannarineqarluartoq, Mary J. Blige, pingasunik nersornaatisivoq, albummi ”The breakthrough”, nersornaatisissutigalugu. Aamma Red Hot Chili Peppers pingasunik pissarsipput ilaatigut nuusiartik rockiusoq ”Stadium Arcadium” nersornaatisissutigalugu.
