Londonip muslimik oqaluffiata eqqaani biilimik saassussisoqartoq

Tuluit Nunaanni nalunaaqutaq malillugu unnuap qeqqata qaangilaaraa, Londonip illoqarfiata avannaatungaani Seven Sisters Roadimi muslimit oqaluffiata eqqaani inuit biilimit aporneqarput.

Muslimit qaammammi uani ramadaneqarneranut atatillugu unnukkut qinoqatigiinnerisa kingorna oqaluffimmit anialeruttortut taama pisoqarpoq.

Inuk ataaseq toqutaavoq qulillu aqqunartitersimallutik, nunani tamalaani tusagassiorfiit arlallit taama allaaserisaqarput.

Angut 48-nik ukiulik biilimik ingerlatsisimasorineqartoq politiinit tigusarineqarsimavoq.

Politiit anngutinnginnerini angut taanna politiiunngitsunit tigusarineqarsimasoq politiit ilisimatitsissutigaat.

Musliminik saassussineq uumissuinermut atassuteqartumik pinerlunnertut nalilerneqarpoq.

- Muslimit sapaatit-akunnerini qaammatinilu kingullerni upperisartik pillugu persarineqartarput matumanilu pisoq nakuusernerit sakkortunersaraat, Muslim Council of Britainip oqaaseqartartua, Harun Khan, taama oqarpoq.

Tuluit premierministeriat Theresa May naapertorlugu, pisoq peqqarniisarniarnertut politiinit paasiniaaffigineqarpoq politiillu peqqarniisaarnianik akiuiniarnermut immikkoortortaqarfiat aamma akuutinneqarluni.