Peqqarniisaarniat saassussisut Londonimi saassussinermi arfineq marluk toqutaapput

Saassussisut angutit pingasut toqutaapput.

Londonimi politiit tuluit nunaanni nalunaaqutaq unnukkut qulit qaangerlugu tanneq marlunngulersoq, nunatsinni arfineq pingasut qaangeraa nalunaarfigineqarput, biili nioqqutinik angallassissutigineqartartoq qaqortoq, Londonimi ikaartarfimmi London Bridgemi inunnik arlaqartunik apuisimasoq.

Biili taanna inunnik arlaqartunik apuereerluni ikaartarfiup eqqaaniittumut ornigarneqarluartartumut arlaqartunik imerniartarfilimmut ingerlavoq. tassanilu angutit pingasut niugamik imerniartarfimmiittunut sunngitsunut savinnik angisoorujussuarnik kapooripput.

Saassussisoqarneranik nalunaaruteqarnermit minutsit arfineq pingasut qaangiummata angutit pingasut saassussisut toqutaapput. Minutsit arfineq pingasut ingerlaneranni arfineq marluk toqutaapput amerlangaartullu ikiligaallutik.

Saassussisut kikkuuneri oqartussaasunit suli paasineqanngillat.

Saassussisut pingasuusut ilaata najugaqarfia politiinit misissoqqissaarneqarpoq, taanna Londonip kangisinnerusortaaniippoq.

Misissueqqissaartoqarnerani inuit aqqaneq marluk tigusarineqarput.

Tuluit Nunaanni ministeriuneq Theresa May aalajangiusimallugu oqaatigigaa, saassussissut tassaasut islamisiortut ingasattajaartut. Taassuma ilanngullugu oqaatigaa, ingasattajaarlutik islamisiortunut akaarinnigatillu oqaluussisartunut akaarinnikkunnarlutik.

Theresa Mayip partiia konservativiit illuatungiliuttullu partiiat Labour, sapaammi qineqqusaartoqassanngitsoq aalajangerput.

Tuluit Nunaanni inatsisartunut qinersisoqassaaq sisamanngornermi juunip ulluisa arfineq pingajuanni.