Liz Truss Tuluit Nunaanni ministeriunertut tunuarniuteqartoq

Liz Truss, Tuluit Nunaanni septembarip ulluisa arfernanni ministeriuninngortoq, ministeriunertut maanna tunuarniuteqarpoq.

Ministeriunerup Londonimi 10 Downing Streetimi najukkami saavani naatsumik oqaaseqaateqarnermini taama ilaatigut nalunaaruteqarpoq.

Pisussaatitaaffimmik parteeqatimit septembarip ulluisa arfernanni tunineqarnini naammassisinnaanagu misigisimagami ministeriunertut tunuarniuteqarnerminut atatillugu oqarpoq.

Tuluit Nunaanni konservatiivit sapaatit-akunnerata tulliuttup ingerlanerani nutaamik maanna siulittaasussarsiussasut, Trussip oqaatigaa.

Konservatiivini siulittaasunngortoq qinersivimmi matumani ministeriuninngussaaq.

AAMMA ATUARUK Truss tunuaqquneqartoq: Tunniutiinnarnavianngilanga

Liz Truss, Tuluit Nunaanni naalakkersuinikkut siuttutut, taartissamik nassaartoqarnissaata tungaanut issiassaaq.

Tuluit Nunaanni inatsisartunut nutaamik qinersisoqartariaqartoq, partiit illuatungiliuttut Labour aamma Liberaldemokratit piumasaraat.

Kinalu konservatiivini siulittaasunngorsinnaaneranik eqqoriaanerit maanna imaaginnavilerput, taamalu kina ministeriuninngorsinnaanersoq.

Aningaasaqarnermut ministeriusimasoq Rishi Sunak, illersornissamut ministeri Ben Wallace, illersornissamullu siornatigut ministeriusimasoq Penny Mordaunt, ministeriunerusimasorlu Boris Johnson, ilimagineqarnerpaapput.