Liverpool-iunngilagut
Nunatsinni sumiiffiit ilaasa atii tassaapput Liverpool Land Ittoqqortoormiut kujataanniittoq aamma Køge Bugt Tasiilap kujataaniittoq. Tamakku kalaalerpalunnerusumik atserneqarsinnaannginneramik? Taama aperisoq tassaavoq Karl Lyberth Siumumeersoq.
Oqaasileriffik ataasinngormat aamma aallakaatitamini nunat aqqi pillugit saqqummiussaqarpoq. Tamanna pivoq aallakaatitassiami "Oqaatsit minutsimut"-mi. Tassani Oqaasileriffik assigiinngitsunik nassuiaateqartarpoq ataasinngormallu tassa nunat aqqi sammineqarput.
Sumiiffiit ilaat ilisimasassarsiortut ilaqutaannik imaluunniit illoqarfiit tusaamasat aqqinik atserneqartarsimapput. Maanna Karl Lyberth apeqquteqarpoq piffissanngunnginnersoq tamakku kalaalerpalunnerusumik atsersornissaannut.
Aajuku Karl Lyberthip siunnersuutai:
Quloqutsuup Qaqqarsui, Kangerluk, Junnuup Nunaa, Tuusip Imarsua, Angakkorsuup Nunaa, Aapakuup Nunaa, Agnethe Nielsen-ip Nunaa, Kaassassuup Qaqqarsui, Hans Enoksen-ip Qaqqarsui, Otto Steenholdt-ip Nunaa, Lars Chemnitz-ip Nunaa, Oodaarsuup Nuugajuttaa, Qooqap Kangerlussua, Arnarulunnguup Qeqertaa, Poorsimaap Nunatarsui, Lars Emil Johansen-ip Kangerliumarnga, Aqissiap Iigartartua, Qeqertaq Pooq, Qiperup Kangerliumarnga, Sassuma Arnaata Itinersua, Inukitsupaluup Qeqertaa, Qaavigarsuup Kangerlua, Lumumbap Qeqertai, Aajuup Iigartartua.
Sumiiffiit ilarpassuit kalaallisut ateqarsimagaluarput kinguaariippassuit ingerlaneranni atorneqarsimasunik pisortatigoortumilli atorneqalersimanngitsunik.
- Nunatta namminersulersimanera eqqarsaatigalugu isumaqarpunga pissusissamisoortoq aamma piffissanngortoq nalilersussallugu Nunatsinni nunanut, imartatsinnut, kangerlunnut, qeqertanut allanullu sunut nunani allamiut kikkuusimagaluarnersut aterpassuisa atsiussimaneri eqqortuunersut, Karl Lyberth oqarpoq.
Illit nammineq siunnersuutigiumasatit ataani allaffissaq atorlugu saqqummiussinnaavatit.
Linki ataaniittoq toorlugu "Oqaatsit minutsimut" tusarnaaqqissinnaavat.