Lightergassi pissutaalluni politiit klubbiliartariaqarsimapput
Nuummi inuusuttut ornittagaat Inneruulat politiinit unnuaq orninneqartariaqarsimavoq. Inuusuttummi klubbimit aniakaasariaqarsimapput qasilitsunik seqqartaasoqarsimanissaa aarleqqutigineqaleraluarmat. Inuusuttut iluamik aneersartorneq ajulersimagaluarput merianngulersimallutillu.
Allattoq Mads Lynge
Qasilitsunik seqqartaasoqarsimanissaa aarleqqutigineqaraluarpoq, lightergassimilli seqqartaasoqarsimanissaa politiit ilimagaat:
- Qasilitsunik seqqartaasoqarsimanngilaq, suugaluarnersumilli seqqartaasoqarsimavoq, tamannalu soorunami akiorniarneqartariaqarpoq, Poul Hansen, Nuummi politiineersoq Radioaviisimut oqarpoq.
- Qujanartumik klubbimi pujortartoqaqqusaanngilaq, gassimilli taamatut seqqartaasoqarsimagaangat qaartoortoqarsinnaavoq. Klubbimut apuukkatta seqqartaasimasut qimaareersimapput, taamatulli seqqartaasoqartanginnissaa innersuussutigiinnassavarput, Poul Hansen oqarpoq.