Lidegaardip Pituffik pillugu oqaasii Espersenimit apeqquserneqarput
Inuit Ataqatigiit sinnerlugit Folketingimi ilaasortaq Johan Lund Olsen, nunanut allanut tunngasunut ministerimut Martin Lidegaardimut tuaviortumik apeqquteqaateqarnissamut qaaqqusisuuvoq, Nunattalu Pituffimmi pissutsit pillugu siunnersuutaasa Folketingimi amerlanerussuteqartunit tapersersorneqarsinnaanissaanut neriunaateqarluarsinnaasoq, Johan Lund Olsenip ippassaq oqaatigaa.
Tassami USA-p suliffeqarfimmik Exelis A/S-imik isumaqatigiissusiorsimanera siornatigut isumaqatigiissutaasimasunik unioqqutitsinerusoq Nunatsinnit oqaatigineqareerpoq, Pituffimmimmi sullissinermi suliffeqarfiit Nunatsinneersut Danmarkimeersullu salliutinneqarnissaat siornatigut isumaqatigiissutigineqarnikuummat.
Exelis A/S-ili suliffeqarfittut Danmarkimi nalunaarsorneqarsimammat, Pituffimmi kiffartuussinissamik isumaqatigiissusiorfigineqarsinnaasoq, nunanut allanut tunngasunut ministerip Martin Lidegaardip oqaatigaa.
Tamannali ilumuunngitsoq, Dansk Folkepartip Kalaallit Nunaannut tunngasunut oqaaseqartitaata Søren Espersenip oqaatigaa. Taanna Danmarkip Radioanut ullumi ullaap tungaani ima oqarpoq:
- Amerikamiut suliffeqarfiutaat Danmarkimi nalunaarsorneqarsimasutut inissiinnarlugu Pituffimmi kiffartuussisussanngortinneqarsimasoq takuneqarsinnaavoq, suliffeqarfik taanna Danmarkimi adresseqartiinnarlugulusooq pisoqarpoq. Nunanullu allanut tunngasunut ministerip nassuiaatai taamaammat atorneqarsinnaanngillat, tassami amerikamiut namminneq maanna aalajangersinnaanngorpaat kina imaluunniit kikkut Pituffimmi kiffartuussinissamik isumaqatigiissusiorfigineqarsinnaasut, Søren Espersen oqarpoq.
Folketingimi apeqquteqaateqarnermut atatillugu oqallinneq KNR-ip nittartagaatigut KNR naggat GL-ikkut malinnaavigineqarsinnaavoq, tassami oqallinneq pillugu toqqaannartumik allaaserisaqartoqartartussaammat.
