Libya sorsuffigineqalerpoq
Maani nalunaaqutarput najoqqutaralugu marlunut tanneq qulingiluanngortoq, franskit malersuutaata, qamussuaq sorsuut nunamiittoq saassukkaa, Parisimi illersornissamut ministereqarfik nalunaartoq, aviisimi Politikenimi allaaserineqarpoq.
Libyami pikitsitsisut illoqarfik nakkutigisaat Benghazi, franskit sakkutuuisa timmisartunik malersuutinik ullumi siusinnerusukkut qulaavaagaat oqaatigineqarpoq, tamaanimi pikitsitsisut aamma Gaddafip sakkutuui akersuutileruttormata.
- Timmisartuutivut illoqarfiup Benghazip qulaaniilereerput, taamaalillutik illoqarfiup saassutarineqarnissaa akornusersinnaaniassagamikku, Frankrigip præsidentia Nicolas Zarkozy oqarpoq.
Tamatumunnga peqatigitillugu oqaatigaa, franskit malersuutaat Gaddafip qamussuinut sorsuutinut saassussinissaminnut piareeqqasut. Ilanngulluguli oqaatigalugu Gaddafi isumaqatigiinniarnissaminut suli periarfissaqartoq. "Ajornerusumik pisoqarnissaa" pinngitsoorniarlugu Gaddafi maanna peqataasariaqartoq, Sarkozyp oqaatigaa.
Taamaalilluni nunat tamalaat Libyamut iliuuseqarniarnerat piviusunngortinneqarpoq. Tamanna Sarkozyp aamma Danmarkimi ministeriunerup Lars Løkke Rasmussenip maanna uppernarsarpaat.
- Maanna oqaluinnarani iliuuseqarnissamut piffissanngorpoq, nunat siuttuisa Parisimi ataatsimeereerneranni Lars Løkke Rasmussen tusagassiortunik katersortitsinermi taama oqarpoq.
Taanna isumaqarpoq, Gaddafi ilaqutaalu qaninnerit nunat tamat eqqartuussivianni Haagimiittumi misissuiffigeqqissaarneqartariaqartut.
Nunat tamat iliuuseqarnerannut Danmark tapersiilluni timmisartunik malersuutinik F-16-inik arfinilinnik aallartitsereerpoq. Taakku Akullersuarmi qeqertamut Siciliamut nunnereerput, Libyamilu saassussinissaminnut piareersimallutik.
Danmarkimi folketingip sukkasuumik iliuuseqarneratigut, malersuutit taakku aallartinneqarnerat pisinnaasimavoq, tassami unnuaq unnuap'qeqqata missaani Danmarkip sakkutooqarnikkut tapersiinissaa oqaluttuarisaanermi siullerpaamik partiinit tamanit tapersersorneqarmat.
