Libya sakkulersornerminik unitsitseqqippoq

- Libyami sakkutuut sakkulersornerminnik ingerlaannartumik atuutilersumik unitsitseqqullugit naalakkerneqarput, Libyami sakkutuut oqaaseqartitaat Ritzauimit taama issuarneqarpoq.

Oqaaseqartitap oqaatigaa, Den Afrikanske Unionimit saaffiginnissummik, sorsuuttoqarneranik piaartumik unitsitsinissamik kajumissaarisumik tigusaqarnerup kingorna, sakkulersornerup unitsinneqarnissaa aalajangiunneqartoq.

Gaddafip sakkutuui ulluni unnuanilu marlunni, iligiit timmisartuinit sakkortuumik qaartartunik saassutarineqareersullu Libyami taama alloriartoqarpoq.

Sakkulersortoqarunnaarnissaa Gaddafip siullermik tallimanngormat nalunaarutigaa, Libyap silaannartaata timmisartorfigeqqusaajunnaarnissaanik Naalagaaffiit Peqatigiit Isumannaallisaaniaqatigiivi aalajangersaareersullu.

Sakkulersortoqarunnaarnissaanik nalunaaruteqareerlutik, Gaddafip ilaatigut illoqarfimmut Benghazimut saassussinertik ingerlatiinnarpaa.

Danmarkimi illersornissamut ministerip Gitte Lillelund Bechip Ritzauimut oqaatigaa, qallunaat malersuutaat F-16-it sisamat Libyap silaannartaani nalunaaquttap akunnerini tallimani ikiuutereerlutik, Siciliami sakkutooqarfimmut utereersimalersut.

- Sorpiaat suliarisimaneraat oqaatigisinnaanngilara, taamaattorli iligiit timmisartui peqatigalugit suliassartik naammaginartumik naammassisimavaat, ministeri oqarpoq.

Qallunaat malersuutaat qaqugu suliasseqqinneqassanersut, Amerikamiut saassussinernut aqutsisuusut aalajangissagaat, Gitte Lillelund Bechip ilisimatitsissutigaa.

Libyap silaannartaani timmisartoqqusiunnaarnerup atuutsinneqarnissaa, Franskit, Tuluit aamma Amerikamiut kisimik isumagisimagaluarpaat.