Liberiamioq 38-nik ukiulik anisitaasoq

Angut 38-nik ukiulik Liberiameersoq, Italiami najugaqarnissaminut akuersissumik tigummiaqartoq, sapaatip akunnerata siuliani ataasingormat majip arfineq-aappaani, Nuummut tikippoq. Politiit naapertorlugit, angut taanna Nunatsinni akunninnissaminut aningaasanik tigummiakippallaarpoq, tamannalu peqqutigalugu anisitaavoq.
Allattoq Sorlannguaq Petersen
maajip 16-at 2012 06:20

- Pissutsinik ilisimasaqannginneq pissutaasartoq, Finn Jeppesen, politiineersoq oqarpoq.

- Inuit Europamiitillutik isumaqartarput Nunarput aqqutigalugu Canadamut USA-mulluunniit ajornannginnerusumik isersinnaallutik. Tassa oqartarsimannguatsiarput: Kalaallit Nunaat Canadamut qanittuararsuuvoq. Umiarsuarluta timmisartorlutaluunniit immaqa Canadaliarsinnaassaagut, Finn Jeppesen oqarpoq.

Schengenimi Luxembourgimiittumi isumaqatigiissut naapertorlugu inuit angalasut tamarmik pappiaraataat misissorneqartartussaapput, Nunarpullu Schengenimi isumaqatigiissummut ilaatinneqarmat, inuit Nunatsinnukartut misissorneqartartussaapput, angullu taanna Nunatsinnut tikittoq misissorneqarmat passi pappiliallu allat ajunngitsut paasineqarpoq, aningaasaateqarpiarsimananili. Taamaammat Danmarkimut utertinneqarpoq.

Inuillu Kalaallit Nunaat aqqusaarlugu amerikap nunavittaanukarniartut Finn Jeppesenip qanoq oqarfigerusuppai?

- Canadamut toqqaannartumik timmisartukkut umiarsuartigulluunniit Canadap Nunattalu akornanni massakkuugallartoq angalasoqarsinnaanngilaq, kingusinnerusukkulli attaveqalerumaarluni. Pissutsilli taamaakkallartillugit Canadaliarniarluni Nunatsinnukarnissaq imminut akilersinnaanngilaq, Finn Jeppesen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq