Libanonimiut Israelimiunut saassussipput
Libanonimiut Israelimut saassussisimasut qallunaat tusagassiorfii arlallit nalunaarput. Aviisip Jyllandspostenip allaaserisaa aallavigalugu Israelip avannaani saassussisoqarnerani inuit tallimat ikilerneqarsimapput.
Allattoq Louise M. Kleemann
januaarip 08-at 2009 09:02
Danmarks Radio allappoq Israel saassussisut akillugit Libanonip kujasinnerusortaani saassussisimasut.
Israel ukioq 2006-imi musliiminik ingasattajaarniartunik Hizbollahkkunnik sorsunnerata kingorna siullermeerluni Libanon Israelimut saassussivoq
Ikiuiniaqatigiinni Røde Korsini sulisut siullermeerlutik Gazap illoqarfiani najugaqarfinnut ippassaq anngupput. Taakkualu takusaminnut tupassimapput, Illut qaartartumik eqqorneqarsimasut akornanni meeqqat mikisut sisamat naammattoorneqarput, anaanamik toqutaasimasup sanianiittut. Meeqqat sanngiillisimapput, nikuissinnaanatik nerisassaqarsimanatillu, Anne Sofie Bonefeld ikiuniaqatigiiffiup Røde Korsip nunat tamat immikkoortortaaneersoq DR-imut oqaluttuarpoq.
