Libanonimi sakkutuuliussassat assortuussutigaat

Libanonimi sakkutuuliussassat ataqatigiissaarneqarnissaat nunat EU-mi ilaasortaatitallit ammasumik assortuussutigaat. Eqqissisimatitsiniarnermi EU suleqatigineqarsinnaanersoq, nalornisoqalinnginnerani EU-mi nunanut allanut ministerit sakkutuuliussassat qanoq ataqatigiissaarneqarnissaanersut tallimanngorpat ataatsimiissutigissavaat.

DR-ip tusagassiortuata Hanne Voighelip Tel Aviv-imit israelimiut nipangersimanerat ima oqaluttuaraa:

- Israelimiut nipangersimaannanngillat. Israelimiut nunanut allanut ministeriat ulluni makkunani Europamiippoq, Frankrigimiit Romimut ullumi ingerlaqqippoq. Taamatut angalanermini Frankrigimi Italiamilu naalakkersuisut nammineq tikillugit Libanonimi sakkutuuliinissaq pillugu oqaloqatigerusuppai. Frankrigimi naalakkersuisut israelimiullu nunanut allanut ministeriata ataatsimeeqatiginerisa kingorna paasinarsivoq franskit siusinnerusukkut neriorsuutimik ilaat tunuarsimaarfigilersimagaat, amerlanerusunilli sakkutuuliinissartik ammaffigigaat aamma paasinarsivoq, Hanne Voighel oqarpoq.

Tyrkiamiut sakkutuuliiniarlutik neqerooruteqarsimanerat israelimiunit qanoq isumaqarfigineqarnersoq, Hanne Voighel aperineqarami, ima akivoq:

Israelimiut tyrkiamiullu ukiorpassuarni sakkutooqarnerup tungaatigut suleqatigiilluartarput. Nunat tamat Libanonimi sakkutuuliinissaanni muuamaamik upperisallit sakkutuuliunneqarnissaat israelimiunit nuannaarutigineqarpoq. Taamaattorli nunat tamat sakkutuuliussassaasa Naalagaaffiit Peqatigiinnut toqqaannartumik suleqateqarnissaat israelimiut kissaatigigamikku, tyrkiamiut neqeroorutaannik itigartitsipput, Hanne Voighel naggasiivoq.