Libanonimi silaannakkut qaartartumeerisarnerit ulluni marlunni unitsikkallarneqarnissaanik Israelip imminut naalakkiutaa unnuaq qaangiuppoq.
Sakkuaakkunnaarnerli suli taamaatinngitsoq israelimiut saassusserujussuarput. Libanonip kangisissuani illoqarfimmi Baalbekimi napparsimmavik qooqqumiittoq qaartartumeerinermi eqqorniarneqarsimasoq, tv-qarfik Al-Manar nalunaarpoq.
Napparsimmavik taanna iranimiunit tapersersorneqarpoq, inuillu hizbollahmut qanilluinnartumik attuumassutillit tassani ingerlatsisuupput. Silaannarmiit saassussinermi raketsit
qaartartullu atorneqarput. Israelimiut naapertorlugit hizbollah-mut ilaasortat arlallit tigusarineqarput. Israelimiulli sakkutuuini oqaaseqartartoq oqarpoq, tigusaasut Israelimut timmisartuunneqareersut. Nutaarsiassaqartitsivik Reuters allappoq, tigusaasut tassaasimasut hizbollah-mut ilaasortat pingaaruteqarpallaanngitsut pingasut.
Hizzbollah-kunnili oqaaseqartartup tamanna eqqunnginnerarpaa, oqarluni, israelimiut sakkutuuisa hizbollah-kkut sakkutuui napparsimmavimmi ungooriarlugit qimaasariaqarsimasut. Inuinnat arfineq-marluk qaartartumeerinermi toqutaasimasut nalunaarutigineqarpoq.