Libanon-imi sakkutuuliipput
Libanonip kujataani eqqissisimanissamik nakkutiginnittussanik Naalagaaffiit Peqatigiit sakkutuuliussassaasa suli amerlineqarnissaat pillugit, nunat EU-mut ilaasortat nunanut allanut ministeriisa Naalagaaffiit Peqatigiit qullersaat, Kofi Annan, ullumi ataatsimeeqatigaat.
- Tusagassiortunik katersortitsineq Kofi Annanip naammagisimaarpaa, Danmarks Radiop EU-mit tusagassiortua, Charlotte Harder oqaluttuarpoq. Nangipporlu: -Annan oqarpoq, Libanonimi sakkutuuliussassat affaat maanna qulakkeerini, naak amerlineqaraluartut. Neriuutigaara, sakkutuuliussasavut siulliit 3-4.000-it ulluni qaninnerni, immaqaluunniit sapaatip akunnerani tullermi aallarsinnaassasut, Charlotte Harder oqaluttuarpoq.
Nunanut allanut Danmarkimi ministeri, Per Stig Møller, oqarpoq, ataatsimiinnerup inernera nammineq aamma nuannaarutigigini, Kalaallit Nunaanniinnini pissutigalugu nammineq peqataasinnaannginnini ajuusaarutigigaluarlugu. Erseqqissaatigaali, Europap akisussaassuseqarnissaminut piareersimanera ataatsimiinnerup takutikkaa.
Frankrig Italialu sakkutuuliiniarput, taakku saniatigut Spania Belgialu aamma ikiuutaaniarlutik. Frankrig februaarip tungaanut sakkutuunik nakkutilliisuussaaq, Italia tullinnguukkumaarluni.
Tusagassiortunik katersortitsinermi Finlandip nunanut allanut ministeria, ukiup affaani uani nammineq EU-mut siulittaasuusoq, oqarpoq, sakkutuut sapinngisamik pitsaalineqarlutik sulinissaat paasissallugu nunat EU-mut ilaasortaasut pisariaqartissimagaat. Ataatsimiinnermi tamanna akissutissarsivarput, toqqissiallaqaagullu, finlandimiut nunanut allanut ministeriat naggasiivoq.
